بوح....ي ؟!

[عبدالله صلال العساف]

كنت بعيونك ...هناك
؟؟؟
كنت متداري ابعيونك
كنت متخبي اهناك
بين رمشك والجفون
داخل القلب الحنون
وبالحنايا
في خفاا القلب
في كل الزوايا
ومو غريب
دام عينك لي وطن
ودام خفّاقك حبيب
تسكنين ابداخلي ...واسكن حشاك
في بعضنا عايشين
انتي حلمي
وانا مستقبل هواك
احضنيني
غربتي طالك
وابيك اتوطّنيني
احبيّبك
واشره عليك
يامنايا
عنْونيني
يوم عزت بالزمن
بعض الهوايا
اتركي الفتنه تثور
من مفرق الليلين؟؟
من بين البحور
واتركي اطراف الذوايب
اتداعب احدود الجليد
وانا خليني اطالع من بعيد
تركض اعيوني
على اوجوه المرايا
انجمع فيك التناقض ...ياغلايا

 

[عبدالله صلال العساف]

يارصيفي ليه مامرّوا ..عليك؟
هالسؤال ارّق عيون الاجوبه
دامهم نامو هنا في ضفّتيك
مادرو هالشّمع شنهو الذّوبه

 

[عبدالله صلال العساف]

لعاب ياهل الهوى لعاب
تعبني الزين بإعناده
يزعل عليه بليا اسباب
وارضيه واستحمل اعناده
صغير سنٍ كحيل اهداب
امعزّل الخصر ميّاده
ترفٍ سنا وجنته جذاب
خشف شذا عنبره ساده
عذب طري عودٍ ونهاب
للروح والقلب واوتاده
لا مرني فايح الاطياب
من خافقي ياخذ امراده
طيرٍ ابدنيا الهوى لعّاب
سبي المحبين له عاده
غصبٍ علي حاز عالاعجاب
امعلم القلب واستاده
الصاحب اللي وقف بالباب
هو صاد سهمي وصياده

 

[عبدالله صلال العساف]

ردي بعض بعضي على بعض مافيه
يمكن تلمين الشتات ابجهاتك
شخص سكن عالم مضا في مآقيه
يشوفهم كل ماتذكر جهاتك
الغارب اللي كل مارام شاطيه
تعذّرت منه الضفاف وعباتك
ياما شرب في صحتك كاس شاهيه
وكل مأستفاقت هقوته خان ذاتك
ياكم من يضحك ابوجهك واياديه
ذيبه يدور بالخفا راس شاتك

 

[عبدالله صلال العساف]

صباح الخير يامنفاي واوطاني
صباح الورد ياتفاحتي الحلوه
انا متعوّد الياجيت وحداني
تلاقيني ثرى وابلادٍ وعزوه
هنا في راحتينك باسقه اغصاني
واذوب من الترف لا قلتلي قوّه

 

[عبدالله صلال العساف]

سولف وخل الذايقه تشرب الصوت
قلت ايه لكن يالغلا ..وين الاسماع
ماعاد باسماعك لنا يالغلا قوت
واغصان بوحي بالثمر وصلت القاع
كورة مشاعر بيننا ملّت الشوت
وحبٍ قبل لايبتدي بيننا ....ضاع

 

[عبدالله صلال العساف]

زلّت السانك لأنجرح منها انسان؟
روح وتعذّرله ...وريّح ضميرك
ترى التواضع يابشر يرفع الشان
وترى الرجوع اعن الخطا مايضيرك

 

[عبدالله صلال العساف]

تروح عنه تبتعد ...بس تلقاك؟
عقب المسافه بين قوسيه مرهون
تمشي ابمحانيّه واهو عنّك اهناك
ويزهر من اشفاهك وطن فيك مركون
وتلم عالم في حنايا...حناياك
واتشتّتك عالم ابروحك يعيشون
متقلّبٍ هالوضع ...منّا ومناك
ويبقى ندي الكف شرواك مديون