بوح....ي ؟!

[عبدالله صلال العساف]

هالملامح تحداها الشحوب
والوله بالحنايا ..مرتجي
ينتظر من هوى الغربي هبوب
وايتساءل تجي..او..ماتجي

 

[عبدالله صلال العساف]

غنيت ياليلى على طير ياللي
من خاطرٍ طاريّكم يستفزّه
وانطر متى مدري علي ابتطلّي
واشوفلك في كل الاوقات حزّه

 

[عبدالله صلال العساف]

لللسؤال ابجديه وللاجابه مسار
وبينهن يلعب الايجاز اما وأو
لا تقول استشف الحرف بين المدار
كم طيور تنوو عالسما وإلتوو

 

[عبدالله صلال العساف]

تغيّر الطعم والاذواق والامزجه
في سرعة البرق اصبح حاضرك ماضي
ياسيدة هالمسا سوالفك مزعجه
لا تتعبين الفراغ ابكوبك الفاضي
بعض السوالف مع الكورال مو منتجه
ليه مطرب الحي مايطرب ومتغاضي
لك من خيوط الحروف ولمة الانسجه
نسجتلك ثوب حرف امتونه اعراضي

 

[عبدالله صلال العساف]

في يدينك يغيض المشْط ليلٍ بهيم\\
ماتعوّد على التأطير والادلجه؟؟
خلّي الحر حر ابفوضويّة فهيم
لظْفرتْه الانامل حسّها مزعجه؟
اتركيه ايتطاير في هبوب النسيم
له مزاجيّةٍ ماتشبه الامزجه

 

[عبدالله صلال العساف]

أجمل أحلام قلبي ماتت إمن القهر
يوم شفْتك إبثوب العرْس تمشي معاه؟
جيت وإعيونهم صوبي تطيل النّظر!
وإسمى قام إيتردّد بين كل الشّفاه
يوم أطالع ألاقى للشّماته أثر
في سنا كل شمعه أنورت في ضياه
في مكان التّلاقي في حفيف الشّجر
في هلاهيل صوتن هز قلبي صداه
في نجوم السّما في أرضنا بالقمر
في خيام الظّلام اللّي إحتوانا دجاه
إبفرحة إمّك وأبوك وبإبتسامة سحر
وإبهنا كل كفٍ قاللك بالرّفاه؟
في عيون المدينه ودربنا والممر
في مكانن حظنّا وإحتظنّا رباه
حاصرتني عيون النّاس وين المفر
عن لظا الغيره اللّى بي وصلْ منتهاه
وعيني لاجيت أطالعْ تعْجزْ إعن النّظر
وصوتي لا جيت أردبه ينتحر في خفاه
لا تعجّب!! حبيبك يوم خنت إنكسر
والظروف اللعينه حطّمت كبرياه

 

[عبدالله صلال العساف]

رابع سنه والحبل لازال جرّار...؟
اشوفك ابعطري وشالك وبيتك..!
وقفازك الوردي على مر الامرار.؟
كل ما اشمّه في غيابك لقيتك..!

 

[عبدالله صلال العساف]

الصــمــت نــوعيـة كــلامٍ بليغــه
نجودبه لعيون من يقرؤونـا
اطْيب ادب شعر يجي عالسليغـه
يترك اثر ابلغ بمن يفهمــونــا
شفلك على كسر الرتابات صيغـه
بها ترتّب دلعنة من جفــونا