بوح....ي ؟!

[عبدالله صلال العساف]

محتاجلك ارض وعناوين وابيوت
عساني القابك وطن مانساني
فيضي الحنان ولا تشحين بالصوت
ودي اشوف ابوسط قلبك مكاني

 

[عبدالله صلال العساف]

ياليل قربلي بفضفضلك اشوي
سولف واسولفك وقرّب واحاجيك
احس بي للبوح ياصاحبي شي
وعجزت اترجم مايجول ابمحانيك
الشمع ذاب وما روى هالعطش مي
عطشا المواصل مايفيده امانيك
نسيتني البارح وسهّرت هالحي
في سامريّة منفي مر ساريك
وسدتني بعده ووسدتك ايدي
واتقولي لجل السهر خوط شاهيك

 

[عبدالله صلال العساف]

ماعادت اعيونك وطن يحتويني؟
تزاحمت فيها المشاهد والازوال
اشوف به غيري هنا من تجيني
واظنون واحداسٍ على احداس تختال
مو بس حرْف الواو بينك وبيني
بعيـدةٍ مهما تقرّبْـك الامـيال
ياجارة الجرح القديم اتركيني
ماعادلك في واحة الروح مدهال
خلاص هالوادي معاد ايعنيني
ياجارته شوفيلك اليوم منزال

 

[عبدالله صلال العساف]

تغيّر الطعم والاذواق والامزجه
في سرعة البرق اصبح حاضرك ماضي
ياسيدة هالمسا سوالفك مزعجه
لا تتعبين الفراغ ابكوبك الفاضي
بعض السوالف مع الكورال مو منتجه
ليه مطرب الحي مايطرب ومتغاضي
لك من خيوط الحروف ولمة الانسجه
نسجتلك ثوب حرف امتونه اعراضي

 

[عبدالله صلال العساف]

ضباب هذا التغلي حيل ما اثقله
اتعبت عينن ابكل لدّاتها تحتريك
احس بك شوق..بانت ميلة السنبله؟
افصح عن اللي تكنه لي وريّح يديك!!
تعال رش الحنان بروحي الممحله
عشان تزهر زواياها بأحبّك وأبيك

 

[عبدالله صلال العساف]

رديتلك والعذر يسبق خطاياي
وادريبك العذر ان لفا تقبلينه
الشوق منفا والوطن صار نساي
والليل ماهو مثل ماتخبرينه
بامدلك قلبي على كف يمناي
وانتي ابكيفك وين ماتاضعينه
حبيبتي دارك ترى في حناياي
صارتلك اضلوع اليحبك مدينه

 

[عبدالله صلال العساف]

آآآسف اذا تعّبتك ابقسوة ال ليه
لولا غلاتك..صدّقي ما ابوحه
مايشره الانسان الاّ ع غاليه
آعاتبك واطلب خطاك السموحه
ودامك زرعتي وردتك في محانيه
تحملي به فوضويّة جنوحه
ليل الوله ينشر علينا مباديه
وعلاّ بنفس اللي يودّك اصروحه
يقيضني الفنجال لامن شربتيه!!
كل ماجمع هالشفّتين ابسفوحه

 

[عبدالله صلال العساف]

ادبنا ظل حبيس ادراجنا في زحمة الاصفار ..؟؟
وللتنويه كم واحد اصفاره اليوم كبّرْته..!!