[صالح الحمود]

------------(( الروافـــد))-----------



إلْيَا عطاك الحظ ظهْره وانقطع فيك السبيل

------------------ كلٍّ يبي يجْحَدْك خصلهْ من خصـالك يا طلال



والْيَا لفاك الحظ واقبل مبتسم مثْل الخليل

------------------ ابشر بِمَن يعطيك مالا تستحقه من خصال



الآدمي من دون حظٍّ يخدمِه خدمة ذليل

------------------ تكفرْ بهَ الدنيا كفر من لا يفكر بالمآل



شفني منَ الضيق اتآكل .. واندثر عمّا قليل

------------------ مثل الحديد اللي مع الوقت ايتآكل بالرمال



مدري وش اللي معمي الأقزام عن روس النخيل

------------------ هو خوف.. والاّ ملعنه .. والاّ تجاهل .. واغتفال



قل لي يابونواف وش حاجة وضوحي للدليل

------------------ لا صرت من بينَ البشر كوكب وهم سود الليال



شفهم على كثْر الروافد أوديه إبْلا مسيل

------------------ كلْ مـا انطمر وادي ظهَر عشرة بطون مْن الطوال



ما فيهم اللي لا بزغ نجمُه صعد وابطى يخيل

------------------ مثل الأهلّه بـ اوَّل ايام الشهر ما من طـَـوَال



واقبحهم اللي ناشفٍ دمّه بلا زود وْحصيل

------------------ محدٍ دري بـ امره ولا حصّـل منَ سْـواته ريال



زي ما تقول اللي توسّط بالدَّرَج وابطي يميل

------------------ محدٍ تحَت شافه ولا شافه احَد مْن العَوَال



واللهِ ما تلمح بهم شاعر على وزني ثقيل

------------------ إلاّ إذا شاف العمى بالليله الظلما ظـِلال



شاعر مِلي .. لولايِ فاضي للترزّز .. والطبيل

------------------ (دوسر) هلي و(عنوز) من بدَّ القبايل لي خوال



واللي يدوّر فيَّ عَـيْـب ٍ غير جهلي بالهـزيل

------------------ مثْل البليد اللي يدوّر مسطره فيها ميال



ما قول كامل ..لا .. حشا .. ينقصني ألقا لي مثيل

------------------ لكنّيَ اشعر بالحيا ممّن يرى فيني كمال



النقص وارد والكمال اللي ندوّر مستحيل

------------------ لكن نسدّد نقصنا بالعزم وادراك المحال



فان قيلِ لك بالناس (كامل).. قل لهم واحذر تطيل

------------------ كامل اسم (رجّال) لا كامل مروءه أو سجال



وان قيلِ لك فيهم ( بطل ) صاحب بطولاتٍ تهيل

------------------ قل بهْ ( بطل أفلام )لا صاحب معارك أو قتال



وان قيلِ لك فيهم (رجل) صافي..نقي..أبيض..أصيل

------------------ قل ذي دعاية (بــودره) واسلوبها جدّاً خيال



وازهد عنَ الباقي فلا بالمركبه رجل ٍ نبيل

------------------ عايشتهم ما عايشَ الرعيان مرياع الحلال



وخلك منَ اللي عارض ٍ مصران جوفه للصميل

------------------ هذا التّبيع ( الإمّعه ) خلّه عسى ماله توال



فالإمّعه من دون عقلهْ كالعَلَم فوق الطويل

------------------ من وين ما هبّت عليه الريح رفرف واستمال



وايّاك تمتن للجواد اللي يدينك بالجميل

------------------ فالجود يذهب مع مرور الوقت والمنـّه محال



عندك مَثَل: اسم (المهادي) راعي الورع القتيل

------------------ أمضى حياته بالعطا والصبْر ما رد النوال



خلّك صحيْب الأوّله لو كان بالشيءَ الضئيل

------------------ يشكرْكِ راع الشكْـر والجاحد تدينه بالمنال



لا تحتقر قلّ العطا .. أو يخجلك بعْض القليل

------------------ قلّ العطا أكثر منَ الحرمان وامساك الجزال



ولا تنتظر من حاسدينك ممدحه دامك جليل

------------------ لكن تأكد ماحْسدوك إلاّ لأنك ذو جـلال



فلحسْد ينمو مع نموَّ المرءِ بالشيءَ الفضيل

------------------ كالشوك ينمو مع نموَّ الورد واعشاب التلال



من لا تشوف الحسْد يحيي سيرته عدّه قتيل

------------------ لا خير في شخص ٍ بلا حسّـاد واذكارٍ تقال


يكفيني منك شرف المرور والقراءة