مسأله مستحيلة

[صالح الحمود]

-------------( مسأله مستحيلة )---------------

الشّعـْر يابْن حسين سوّابي اسواه
-------------- ضـيـّع حـيـاتي ضـيـّعَ الله خـلـيـلـه

كم ليلةٍ سـهّرني واسْـهرت لـيـلاه
-------------- وكم لـيـلـةٍ عايشـت به ألـف لـيـله

اروج به مثـْل احمر الروج بشْـفاه
------------ واجمع شعَرْ راسي واحطّه واشيله

اكتب شطر..وامحاه..واحاول انساه
-------------- واحيـاناً أخرى اتركــه في صميله

عجزت ألاقي شِـعـْر ما قيل شرواه
------------- الناس قـبْـلي لـم تـدع لي وسـيـلـه

كل ما طرالي بيت واوفـيـت مبناه
------------- لقيت فـ اشـعار الـخـلايق مثـيـلـه

تكاثرت فيه المـعـاني والاشـباه
-------------- وتشابهت فيه الصّوَر والحصيله

بعْض العرب شِـعـْره مثـِلْ بيضة اخـْـصَـ....!
-------------- يفرق عنَ الأنثى ويشـبه زمـيــله

ما كلِّ من يكتب شـعِر يدرك احلاه
-------------- وما كلِّ من يـدرك حــلاتـه يجـيــله

الشـّعْر شيٍّ لا تعـمّـقـت باقـصــاه
-------------- تـدري بـأنّه مســألـه مسـتحـيـلـه

الشاعر اللي يغرف الشّعْر من فاه
-------------- ما هو مثِـلْ من ينحـتِهْ بالطويـله

كم شاعرٍ سوّى قصيده على..آه
------------ سوّى..وسوّى.. لكنِ اسواة..هيله!!

يا عــلِّ شـعْرٍ ما يـزلــزلـك مـعـنــاه
-------------- ينـبـح علـيـه الكـلـب..وِيْهزّ ذيـلـه

الشّعـْـر إنْ لم تستطيعهْ .. تَـعَـدّاه
------------- جــرّب بــدالـه شي واترك سبـيـله

ما هو ضروري تكتشف وش خفاياه
------------- لكن ضروري تكـتشف وش بديـلـه

أمّا أنا مـالي غِـنـى عـنـْه..واهــواه
------------واعْرف قبيح الشّعـْر واعْرف جميله

أقبح قبيح الشّعـْـر واخزى خـزاياه
-------------- ما قلت في نفسك عسى الله يزيله

واحلا الشّعِرْ..واجمل معانيه..واقواه
-------------- ما حـاك في نفســك تسوّي مـثـيــلـه


ما حاك
....في نفسك
.........تسوي
.............مثيله