صوت وصدى ..امي بعد فقدها مفجوعي!!

[محمد علي الثوعي]

*صوت*

يامل قلبً طوته احزان يالثوعي
...........ياكثرها في كنين الصدر مخفيها

على فقيدة حياتي غلق اسبوعي
............وعيني سكب دمعها من ود غاليها

ماروحت مع قطين البدو بنجوعي
...........من ديرةً مجدبه كثرة مضاميها

ولاهاجرت عن وطنها حدها جوعي
...........جيرانها هاجرو واخلت مبانيها

راحت برحله مافيها للملا رجوعي
.........حكم القدر يالعسيري بامر باريها

امي بعد فقدها بالحيل مفجوعي
..........من بعدها اصبر بنفسي واعزيها

عزايه اني لها في دنيتي طوعي
...........تامر وتنها علي ودوم البيها

ويازين لاقالت ابو عمر مركوعي
..........كلمه من لسانها ماكبر معانيها

يالله عساها مابين انهار وازروعي
.........في جنة الخلد تنعم عند واليها

(رحمة الله عليك والدتي)

ابو عمر
*فالح عائض السميري*
1439/2/26

*صدى*

قافك يثير الشجن بالحزن مطبوعي
........ياللي كتبت الشعر والعين تبكيها

ترثي فقيدة عمر والقلب موجوعي
.........ابيات شعرك حزينه من يجاريها

فالرد مالي عذر والشك ممنوعي
........شرهت يدين الوفا منهو يخليها

الفقد يابو عمر كم سيل دموعي
........احس في لوعتك من قبل تبديها

الأم من هو فقدها صار مجزوعي
........لو هو كبير العمر لازال يرجيها

يا الله ياللي رزقت افراد وجموعي
........اجعل لها بالقبر نور(ن) يباريها

اسكنها في جنتك والذنب مرفوعي
........الخلق في دبرتك يارب تنجيها

الموت حق(ن)على الانسان مشروعي
.........لا بد ما نترك الدنيا وما فيها

العبد في دنيته لا هي ومخدوعي
........واعمارنا يا السميري بامر قاضيها

*محمد الثوعي*