الشوق

[عبدالله البطي]

لا والله ان الشوق سوى عمايل
سرى كفيف الشوف والعاجز الشوق
انا احسب انه من بطون الحمايل
واثره لا مهذب ولا يعرف حقوق
يدحم قلوب الصامدين الاوايل
ويهز جاش الي غدى كله حروق
البارحة صدري ثقيلن وشايل
كلام مايعجب هالحسن والذوق
كني سحابت صيف مرت تخايل
من فوق قطعان ومراويح واعروق
يرجون من بطن السحابه مثايل
كني عزيزن مر ضايق ومخنوق
مانيب لا مخطي ولا ني بعايل
لاصار حظ الادمي كله اعقوق
ودي يغسل الغيث كل البدايل
وتورث مفاديها جوامع على السوق
وتنعم بها بالخير كل القبايل
ومن خيرها سموك ياالحظ مرزوق
يالايمي بالشوق لو كنت قايل
وش يعجبك وابني على كل طاروق
على اللحن عصف الضمار الاصايل
اليا تخطرا جاك عاصف وسابوق
معناه حبك وحد مثل السلايل
الي قطع ماهو مداري على ارفوق
اليا دعاني جيت وان جيت طايل
اعدها والقاف لا قلت مرموق
وابو جميل ان عد كل الجمايل
بالمن معروفه غدى هابط افروق
وابنصحه واعطيه كل الدلايل
ختم الدليل الي على النصح موثوق
اليا عطيت الناس مد الجزايل
ترى الكرم موروث للجيل بعروق
ولاتمنع المعروف لو هن قلايل
بعض القليل احيان يصعد بك لفوق
لو لا الكرم ما تشتهر ارض حايل
الي على المعروف لازامت احقوق
شمر لها بالطيب روس الطوايل
العاليات اتشوم عن كل دانوق
ويوم ان سال الغيم والشعب سايل
هيضني الهاجس على سرد منطوق
صحى ضميري يوم قلبي يحايل
عيني عن اسهاده ونومه بخانوق