مشهد صوتي ورؤية اقرب .. !

[فهد دوحان]

موسيقى تصويرية :

انسان ويعيش الحياة بعقل في حد الجنون
ـــــــــــــــــــــــــــــــــــــــــــــــــ، احاول اجمع ما تكسّر وانكسر فيه وحدي
تحت السما المفتوحة الابواب يملاني سكون
ـــــــــــــــــــــــــــــــــــــــــــــــ،ــ ـــ اطفي مثل فرحة حبيبين بظلام ٍ سرمــدي
بشويش بشويش وحضنت الما وبللت العيون
ـــــــــــــــــــــــــــــــــــــــــــــ، تشققت روحي من الوحدة ،وفضت من جْسدي

توطئة قبل صعود :

( 1 )

هذا قميص الظن ( قـُدَّ من دبـِـر )
اسمع خطى روحك
بنفس العطر
والشعور المرتبك والمستقر
المايل لفتنة
ومستقيم بكل خير وكل وشر
اعـَـْرف انك تمر
تزرع ظنونك شوك
وازرع لك من ظنوني زهر !

يا كم نبي من وقت
يا كم من نبي؟!
يا كم ( نبي ) نحتاج نتطهر معاه
من غير ما يبقى قميص العمر مقدود الظهر !!

صعود بعد توطئة :

( 2 )

وين ديارك ؟
يعني ما تدرين انك بوصلتي
لما اكتب
واتبعثر
واحتاج لأكثر ؟!
ما اكثر من نورك الا المستور بنورك
او ظلما تشوفك : تتعثر ..
كان المتمايل في روحي هالليلة يوحي :
انك تاريخ اجداد
باحفاد القطفة الاولى .. لزيتونة روحي ..

البذرة والتربة الممطورة
السقيا والارض المنذورة
الرحمة والغيث المحيي
القلق الساكن عيني
والقاتل بوحي

كنت اكتب لك معنى بكر
احتاجه مع بعض اشباهي
انت ِ..
الشعر ..
البنت الـ غابت من عمر
المعجونة ببذور الهجر ..
وخلت سيرتها عصفور بصدري لين اليوم
- وهذي الساعة -
يدور عن ذبـْحه ..
لو طاري عذر!

كنت اكتب لك
وانفض هذا العالق بعيوني :
ويفيض النهر ..

كنت اكتب يا " نور الارض بعيني "
واتمادى
واصرخ
احتجت اصرخ
احتجت
احتجت
احتجت ..
وكنت احتاج اسمعني بصوتك
واتطهر بك
لين اشعر في معنى الفجر
ويصير الصبح اجمل
واطول
واكثر

واشرق للأرض أجمع شمس
واشرق فيك
واشرق لك
بانوار الدنيا

:

يمكن مقنع هذا العذر
يمكن مقنع
يمكن جدا ..
جدا
جدا
يمكن عذر !

موسيقى نهاية العرض :

محتاج لعيونك أكثر مـا أظن وتظـن
ـــــــــــــــــــــــــــــــــــــــــ، ابي اغمض عليك ، ابي اغمض معاك
ابي تكون آخر اللي شفت في هالمدن
ــــــــــــــــــــــــــــــــــ،والناس ، ابعـْرف شعور الناجي من الهلاك
من بعدها صير منفى لاتصير الوطن
ـــــــــــــــــــــــــــــــــــ،والبرد والخوف ، وما يعني من الارتباك !