مشاركه اولى

[محمد العضياني]

السلام عليكم


تبيني غصب (كذابك ) وأنا مدري أجيك منين
رضيتي حكمهم فيني وأنا ادري ما تعرفينة

سألتيهم عن أسراري وقالوا حلمه التخوين
سمعتي صوتهم فيني وصوتي ما تراعينة

خذوك بفكرة إني شي عايش غايته شيين
يبي يجرح يبي يكسر وتوبي لا تحبـــينـة

عيونك ناظرتني ليــل ما يعطي ولونه شين
ضياع إحروف في جيبة سراب أحلام تكوينة

إذا عقلك وقف عندي أبي أعرف وليه اللحين
حرام اللحين بس اللحين خيارك لا تخذلينة

خيالك ما يبي يفهم أجل وشهو له إتحسين
كثير اللي يبيون القرب عسى فيهم تلاقينة

تحسبينك قريتيني وأنا ادري السالفة تخمين
كتاب أخبار وهمية رضا بك قبل ترضيـــــنة

عدالة نظرتك (مالت)حقوقي في سماعي وين
تخافين اجرحك (طيب) خفوقي لا تغبنينة

علامك ليش ما قلتي يجوز بحكمهم مخطين
علامك ما سألتيني عن اللي في تظنينـــة

وإذا تبغين أشرح لك أنا أبغى منك تبغين
عشان أذكر لإني صرت ناسي واقعي وينه

أنا شخص(ن) مشى جنبه جدار(ن) مابنوه بطين
على شارع سنين الصمت فارق كل غالينة

انا الديجور في حلم الملاجئ والوعد توطين
وأنا ليلن تعب حلمه تصيح الشمس في عينة

وأنا واحد يبي واحد وقف من دونه الثانيين
شرى قربه بروحه بس صدّق حكي ناهينة

أنا العادي وأنا المانع وقف في وجهة العاديين
وصار الناس يحكونه بعد ما كان غافينـــة

لساني يكرهـ الكلمة وإذا ذنبي اعرفه زين
وأنا وش لي بزود الهرج لو به ناس باغينة

بنيـــت إبدولـــتي بيتي حدودي كلها خطين
إذا ودك تجي (ودي) ودرب الــ(لا) تدلينــة

أموت إبعزتي واللحين أخير إمن الردى بعدين
ولو قلبي يبي ذلي نذر لأقطــع شرايينـة

وإذا ودك اجيك ابكي أنا با قوللك تـبطــين
غرورك ما عرفني زين روحي يا مسيكينة

وجودك لو تبيعينة عروش املوكنا الفانيين
خذيهم لك وروحي بس رجوعي لا تطرّينة

أنا جيتك أبي قربك وأحسبك يوم أجي تدرين
رسمت بلوحتي سري وقلت آكيد تقريــنة

فتحت أضلاع صدري لك وقلبي بينها مسكين
وغطيته بعد ما خفت اجي يمك وتنســـينة

حكيت إلك الصراحه بس أضفت لنطقها تنوين
مبي أصحى على واقع اخافه ما تخافينة

أخاف اخطي ولا القى للعذر في عالمك تدوين
وأخاف اشرح حقيقة واقع(ن) يبغاك تدرينة

لإن الجرح ما هو جرح أيادي والخطا سكين
عذابي يا عذابي جرح قلبي يوم تجفيــنـة

وأنا ما أبغى أعيش البعد أساير مركب السالين
(أبي) (ودي) ولكن الصبر من وين تمكينة

تعالي وإفتحي قلبي وشوفي حرقتك تدرين
ولا لي ذنب في حبك وصوتك يوم ترخينة

خذيتيني وانا صاحي على مرأى من الصاحين
تركتيني عشاني شي يمكن يوم تبكينة

دخيلك ليش تحييني وأنا قانع بموت اللحين
دخيلك ليه جيتيني مدام الصعب ترمينـــة

أنا وإنتي تلاقينا بعالم ما يبي إثنيـــــن
وإذا هذا خطاي إنتي خطاك اكبر عناوينة

أمانه لا تخليني أصير إبعينهم مسكين
لإني شلت كل إحدود كوني لأجل تشرينة

ترى عادة حضور الناس ما يجمع غلا الغالين
وإذا إنتي رضيتي الظل أنا غارة ميادينة


محمد بن ضيف الله العضياني

 

[لوعة الشوق]

وعليكم السلام ورحمة الله وبركاته

اهلا وسهلا فيك اخ وشاعر يبشر بقدومه

قصائد جميله مثل هذه

قصيدتك مع هذا الصباح بنسماته البارده
كانت كالدفء الذي يحتوي صدور المحبين
ليدخلهم في برواز صورٍ لهم مع اشخاصٍ
اخذتهم الحياة بعيدا ولم يبقى منهم سوى
صور ..!




تقبل مروري
لوعة الشوق

 

[جُمان]

محمد المضياني ..

تَدُسُّ فَجراً وضَّاءً خَلف كُل حَرف
حُضورُك الأول بِمثلِ هذا الشِّعر مُغرٍ بِالمُتابعة
أهلاً بِك بُعداً واعِداً بالجَمال
ومرحباً تليق
.
.

 

[ماجد الذويبي]

محمد العضياني

أخي العزيز

وهطول كالمطر


ساعود له عن قريب بحول الله تعالى



كن بخير لحين ذلك

 

[عبدالله العويمر]

محمد
وحُضُور يُنَادي الدّفء

نَص جَمِيْل
أهْلا ً مُمْطِرَهـ

 

[أكرم التلاوي]

الكريم محمد العضياني

وحضور أول يبشرنا بوابل من الشعر القادم
أهلا ً ومرحبا ً بك بيننا في أبعاد وأهلا ً بالشعر
لك ودي وتقديري

 

[سكون]

حكيت إلك الصراحه بس أضفت لنطقها تنوين
مبي أصحى على واقع اخافه ما تخافينة

الشاعر/ محمد العضياني

قصيده مليئه بالاحساس


دائما لشعرك نكهة الصدق

مرحبا بك في ابعاد الشعر
و
دمت بألف خير