[ يوميات إعلامية في المطبخ ]

[حنان محمد]

اليوم الأول :

قررت في هذا الشهر الفضيل أن أثبت للجميع أني طباخة ماهرة
قلت في خاطري عيب أكون إعلامية أد الدنيا
وطباخة فاشلة << مصدقه عمرها إعلامية أد الدنيا أأل ..
فأول شي سويته دورت في مكتبتي على كتب الطبخ
أنا أعرف اطبخ مرة تصيب ومرة تخيب مرة العيش يصير مضروبه
ومرة اللحم يصير مطاط ومره الدجاجة محترقة
بس الحياة تجارب ومافي أحد أنولد وهو عارف كل شي
ومع الأيام بيتعلم يعني كم طبخة تحترق وبعدين تصيب
المهم
لقيت كتاب الطهي لعايشة التميمي صاحبة القلب الأبيض والانامل اللذيذه
اللي يشوفني لحظتها
كأني لاقيه كنز عظيم
وأنا اتصفح الكتاب لقيت الشي اللي انا احبه موت وهو

[ اللقيمات ]

و تسمى عوامات ويامكثر الاشياء اللي في حياتنا اليومية عايمة وماشية على البركة.. أو لقمة القاضي وياما قضاة من أجل تحقيق العدالة مب لاقين لقمة ياكلونها ..

طبعا شفت المقادير وركبت سيارتي على أقرب سبورماركت اشتري منه
ورجعت البيت وصرت أمشي على الخطوات خطوة خطوة
وعقبها قعدت اراقب العجينة وهي تنتفخ في لحظتها تذكرت
أن هناك العديد من المشاكل تكون صغيرة وتتضخم
مع زيادة جرعة وسوسة الشيطان أو في تدخل أطراف آخرين ..
وأحيانا احنا نضخم الأشياء البسيطة ونعطيها أكبر من حجمها ..
وأحيانا إعلامنا يعطي الشي أكبر من حجمه وينفخه لين مايوصل حد الانفجار ..

انتفخت العجينة .. وحضرت القلايه وحطيت الدهن بس واجهتني مشكلة عظيمة ..
أنا ماعرف أكور اللقيمات
حاولت وحاولت ومافي فايدة ..





بس شوفوا شاللي طلع معاي