على هامش عمق أنثى جموح

[أنثى جموح]

آنا مشيت الصعبِ لجْله منِ اسنين ...............
ويـقول لــي : (ندماااان لـنّي عرفتك)

غــابت تفاصيلي وشاحت بي العين ...............
ودّي لو اسأل (طب أنا فـ يوم خنتك؟)

غصّيت بـالـصـــدمـــه ، ومرّرت ريقين...............
واوغرت صـدري ثمْ نطقت بـْ(فهمتك)

والـحين انـــا ويــني وذاتي أنـا ويــن؟ ...............
يــا حبلِ وصــلي لـو بـكـيـته عـذرتك

مابي سوى راحــة قِلِيبه وهـــالحين ...............
يـا قلب هـدّي لــو طـلـع مـنْكِ صنتك

ابــكي ولـكن بـ الــمـلا أظـهـر الـزين ...............
بـعض البشر تشتـاق لو لـه كسرتك

واللي رحـل مـــا نــطلـبه ردّ لـلـــدّين ...............
ربي يعوّضني ، وَقِـلّـك : (جــبــرتك)

 

[أنثى جموح]

ويا محلى العشق لما نكون صغار ، ويا محلى تفاصيله
ومن كثرة تفاصيله نسيناها ، أو أصلاً ما ذكرناها
ولا حتى طَرَت سيره !

وفالديره : أبوي وْ أمه وْ أخته
...وجيرانٍ يعرفونا
وكل شخصٍ يزورونه : يحاكونه
عن اللي بين قلبينا
وعن الغيره !

وأتذكر :
إذا لميته وْ لمني ... أبد ما نذكر الشارع
بس أحياناً نخبّينا تحت شباك
ويا ويلي إلى منّه زعل مني
وقل لي انتي صغيره !

وأنا أبكي

 

[أنثى جموح]

|
لك الله يا صُرُوف الوقت وظْروفه
................... من الدنيا : غسلت إيدي من الدنيه
|
حسبت إني فهمت لـْ قلبي وخوفه
...................... واتاريني على خبر أول اجروحي !
|
حسبت إني درست الوضع وصْنوفه
................... حسبت إني بعد كم يوم متهنيه
|
لقيت ان الوجع أستجمح بـْ شوفه
................... لأن مالي سوى الأوجاع وجْموحي !
|

 

[أنثى جموح]

قصيدة (آه الكراسي)
في صفحة [أوزان] في صحيفة [عالم اليوم] الكويتية
شكراً لــ خالد المويهان



رابط الصفحة لمن يودّ الإطلاع على فحواها
هنا

 

[أنثى جموح]

وَإِسمُهُ [ذئبٌ] وإِسْمِي [ــــــــــــــــــــــــ]

سلاسلٌ قد قيّدت روحي بــ "أنتِ صحراءٌ ، وأنتِ تصحّرِ"

وأنا كـــ "خط الإستواء" جُمُوحي !


*

*وأجِلُهُ ، وأنا التي علمي بما لا يعلم الأغرار !

*

*لي من لدن قهري كآبة مظهرٍ ، لا للجمال الظاهري العاصي !

*

*وأمام كل الشر ينشطر الهوى ، حتى يفارق من يقارف ذاتي !

*

*لا يذكر التاريخ أني طفلةٌ ؛ إلا إذا جالت سمائي أنجمي !

*

*لي من حديث الليل سرٌ جهرُهُ يفضي إلى عمرٍ جريرٍ قاصي !

*

*لكِ من فؤادي صرخةٌ فيها وجع ، لا يحتمل جُرمي ولا نكراني !

*

*فليعتذر ، ما لعذرٍ بعد احتراق الروح روح !

*

*كم من ضلوعٍ تلتوي فوق اللهيب !!

*

*وكأنني فانوس كونٍ وانطفأ ، والغفوة العذرى تنوح !

*

*

ليست بليلة فضفضة
مجرد هذيان ، سحقاً لـ أبعاده التائهة ....!

 

[أنثى جموح]

مقال : توثيق العلاقات الــ " بْرَذَريّه "

البرذرية من كلمة Brother ... يعني أخوية

في محادثة شبه قصيره بعد يوم ثقيل متعب ومهلك للأعصاب ، وانا على وشك السقوط أثناء السير من مبنى إلى آخر تحت أشعة الشمس الساعة 2 ونصف ظهراً

أنا .. و .. [دعوني أرمز لها بـ(3 في 1) حسب ما هي طلبت مني لما سألتها عن الرمز اللي تحب ان تظهر فيه في هذا المقال ، واختارت (3 في 1) ]

* للأمانه : هي قالتلي Three in one بس بسميها (ثلاثه في واحد)

المهم :

تكلمنا .. تكلمنا .. تكلمنا .... لييين وصلنا حق صورة ولد اختها فديت قلبه لو انكم شفتوه ما شاااا الله عليه يهبّل ، أحلى بوايد من اللي فالصوره ...

عمره 6 شهور ، وعنده أخو أكبر منه عمره 4 سنوات ، وكعادة معظم الأطفال : يغاااار من أخوه !

(3 في 1) طلعت لنا بحلّ مميز وحلو حق هالمشكله ، والهدف من هالحل هو توثيق العلاقات البْرَذَرِيّه بين الصغيرون الحلو والكبير الغيور ...

شـ سوّت لهم؟
يابت حبل ، واربطت سيكل الكبير مع قعّادية الصغير

* القعادية : حسب ما قالتلي (3 في 1) هي اللي يقعدون فيها الصغير عشان يتعلّم المشي .... نفس اللي فالصوره : )))

سألتها انزين شدخل !

قالتلي : "لازم ! انتي لما تربطين القعّاديه بالسيكل : شي طبيعي ان الكبير يوم يمشي فالسيكل : الصغير اللي فالقعاديه بيمشي وراه مجرور ورا السيكل"

ويا عيني عـ اللي راكب السيكل لما ياخذ له لفه وسيعة على الكورنر فالبيت لانه مثل ما قالت (3 في 1) "يراعي ان فيه مخلوق وراه بيمر في نفس الكورنر"

إذا ما كان فيه مجال يوسّع اللفه : القعاديه تشيّر بالمخلوق اللي فيها ؛ وهنا يبرز دور البطولة للأخ الأكبر "راعي السيكل" لينزل عن [جرّاره] السيكل ويفكّ راعي القعاديه من المأزق اللي شار فيه !!

لاحظوا ان الكبير بيتعلّم انه يحسب حساب أخوه الصغير يوم يوسّع له اللفة ،
و
لاحظوا انه بيحس إنه إنسان مهم له دوره في إنقاذ "راعي القعّاديه" ،
و
انه ذكي ! بطل ! شطور ! يعرف شلون يتصرّف "في أحلك الظروف"

من نتائج عملية الربط اللي وصلت لها أختنا (3 في 1) مثل ما قالتها بالحرف :
"ان الصغير الحين يوم يبكي : يجي له أخوه بسرعه وينزّل راسه قدامه ويقول له : إلعب إلعب" >>>وتأشر على راسها يعني انه يقول حق اخوه إلعب إلعب بْـ شعري !

ملاحظه : راعي السيكل انا شفته ما شاااا الله عليه شعره طويييل وناعم ..



السموحه طوّلت عليكم
وشكراً لكل من مرّ هنا

 

[أنثى جموح]

* محمد المناعي :

يا زينه الرجال لينه تزوّج .. ويصير أزين لين كثّر زواجات
وحده وما تكفي لهمّه تفرّج .. ما تنفرج إلا بأربعْةِ زوجات
وانا نصيح وللتعدد مروّج .. بالكثره اقضوا كثرة الاحتياجات





* أنثى جموح :

يعني التعدد صار ميزه تِتَوّج .. راس الذي فكر يعدد ، ومنجاة؟
ياخي ترى الموضوع مابه تعوّج .. بالعدل وللا لا ترحّب بمن جات
الله عطاك الزين ليه اتفرّج .. صوب الذي ما زاد وصفه بِحَاجات
خل عنّك الترويج لا لاتنوّج .. رفقاً بحبك لا تكسّر زجاجات
هذا جوابي كان ودّي أفوّج .. عن شي في نفسي وَغَيّر مزاجات









،










وعاد محمد المناعي :

غيّر وتنجح كان تبغي اتّخرّج .. بدّل شموعك في جديد السراجات
حلّق بأفكارك وارقى وعرّج .. بالفكر تسبق علم سِيد الخواجات
لا ينفع المكياج وكثر التبرّج .. اشتر جديد و لا تروح الكراجات
الدرب ماهو عسر لو هو مدرّج .. جرّب ونوّع خلّ عنك المناجات
تبغي تروض خيول ؟ إلجم وسرّج .. بالجمع لا بالفرد يعطوك تاجات
هذا اختصار الهرج دون التهرج..وانشر لنصرة حملة الازدواجات !

 

[أنثى جموح]

،

شفت اللي صار ؟
كل اللي صار ؟
شفت الغبار ؟
شفت الزلازل والدمار ؟


[[ شفت الحكي لما البكي يعجز يرتب له حروف ؟]]


شفت الظروف ؟
شفت الأماني العاجزه ؟
شفت الحدود الحاجزه ؟
شفت السدود ؟
شفت الوعود ؟
شفت الورق لما يطير ؟
شفت الشجر لما يصير ... أسود من ألوان السعير ؟
شفت النهر ؟
لما ظهر ؟
شفته إلى منه غضب ؟
شفته إلى فاض بـْ مصب ؟
شفته إلى يجرف بيوت ؟
شفت البحر ؟
لما البشر ... صاروا كما سيلٍ عَرِم ؟
شفت الهَرِم ؟
لما يسولف للقناه ؟
لما فقد بيت وْ فناه ؟
ويقول بس : هاذي الحياه !!!
شفت الطفل ؟
لمّا يطل ؟
من تحت أنقاض الوجع ؟
شفت الهلع ؟
شفته؟ رجع ؟
شفته إلى منه يحوم ؟
يسأل يبي أمٍ رؤوم ؟
يسأل هنا وهْناك .. قوووم
وتقول له جارتْه قوم
أمك صخر بيتك رما .. أمك
(عمى) قالت
لِما ؟
لانه طفل !
طار العقل ...
غصه ، وْ دِما !!!
،
وين اللي في أرض الحِمَى ؟
واللي احتمى ؟
حتى ميادين القتال ؟
شفت الرجال ؟
اللي إلى سلمه دعوا ... صاروا كما قدر الرمال ؟
شفت القهر ؟
،
شفت الضرر ؟
شفت المطر لمّا يزيد ؟
شفت البعيد امن الأماني والوريد ؟
أصبح قريب ... وْ ما يحيد ؟
،
ذاب الحديد !
شفت الجبل ...
لما له الغيث اعترى ؟
سار الجبل !
والله سرى
،
شفت الجمل .. في هالعرا ؟
لما يطيح امن الجفاف ؟
شفت العجاف ؟
،
حان القطاف
حان القطاف


[[ شفت الـ حكي لما البكي يعجز يرتب له حروف ؟
شفت الحكي لما البكي يعجز يرتب له حروف ؟

شفت الحكي لما البكي
ايوه البكي
يعجز
يرتب له حروف
يعجز يرتب له حروف
يعجز
يعجز
يعجز
يرتب له حروف !!!



لا تشتكي ! ]]

.
.
.
.
.
.
.
.
.


وقتك اللي من بدت هاذي الحياه
لين يومك
يَ بْنِ آدم
وش يكون ؟

غير تذكيرٍ؟
وذكرى؟
وانتباه؟
غير تخطيط
وْ
دراسات
وْ
فنون؟

غير مطعم
فيه وجبات وْ مياه؟
غير طلعات
وْ
صغارٍ يلعبون؟

غير وغير
وْ
غير وغير
وْ
غير.......
جاه
ينتهون !
أقسم بربي ينتهون !

ذا النبي
-صلوا عليه-
جاكم ضياه
مصحفٍ شرحه أحاديث وْمتون ...

مالنا إلّاهِ به نهج الهداه
مالنا إلّاه
تهذيب
وْ
شؤون

غير هذا
" مثلنا مثل الشياه "
لا وربي! يمكن انهم يفهمون ...

.
.
.
.
.
.
.
.
.

تعجز أبياتي ولا فيها حياه
يمكن الباقي على موعد يكون ....
يمكن الباقي على موعد يكون ....
يمكن الباقي على موعد يكون ....

.
.
.
.
.
.
.
.
.
.
.
.
.
.
.
.
.
.
.
.
.
.

يمكن !
















~أنثى جموح
يوم الجمعه 22 / 4/ 2011