على هامش عمق أنثى جموح

[أنثى جموح]

صعب جداً إذا جـيـتـــه أبتخيّلْه مـو يمي
صعب جداً ولا يمكن يدق قلبي معا غيره

سهل جداً لو يْوافق أبوي ويرتضي عمي
سهل جداً أبتزوج حبيبي وانهي السيـره

تهندسني زوايا طلة عيونه
تخليني غصب آجيه مفتونه
أبيه وما أبي غيره
ولا يحتاج تأشيره
دخل قلبي
قلب دربي
وهو مجنون
ومن قال انه بعكسي
تراي أصبحت مجنونه !

لا تلوموني إذا في يــوم هــــــدّيت المـزاج
مــــــا لقيتوني حوالي حجرتي أو فالسرير

المحبه انطلاقه مــــــــا يحــددهـــا سـيـــاج
والوداد أصدق من اعنادي ولمســاته حـرير

خلّني عنده أزوره بــالـــحلال وبالــــــزواج
أبرك مْن الغصب يلي تالِيَه وضعٍ حــســير!

وأنا أدري .. علي بدري
تقولولي أنا حره
ولكنكم ولا يمكن تخلوني على قهري
وانا أدري
ولا يمكن أهون وينتهي قدري
ترى الهوى
كله دوا
وراح أسمع تهانيكم
وانا جنبه أواسيكم
تراي بْـ خير
على عمي بوصّيكم
ولد عمي ترى به خير
بيلقى له نصيب أحلى
مثل مالي حبيب أحلى
والاقيكم
تبسّمتو
معي قلتو
يا رب أيامنا تحلى !

آهٍ على حظٍ كتبلي في غرامه مستحيل
ألتقي به لو تقوم الدايره ما ألتقيه ..!



من يقول إن الأماني ما تحقق وسط ليل؟
من يقول ان الكبوت بْـ يمنع أطرافي تجيه؟



راح أجيه وْ ألتقي به والحلم أكبر دليل
والدموع اللي سكبها خافقي هم تحتريه



والعلوم اللي طرتلي في غيابه ما تحيل
بيني وبينه وروحي ساكنه عنده وفيْه



الغلا والشوق والعتمه وموال العليل
وانحياز القلب أكبر من تبلّيكم عليه



والمحبه والعشق والهم ما يلقى بديل
كل فرحي في جنابه يا كثر مانا أبيه !

,