شَمعهْ..!

[محمد الغشام]

,

,


على نظرة مدى
جيتك أشوف الطير لا رفرف جناحه من طرف عيني هُدى
مطر ماجاني البارح
رغم هذي الغيوم اللي تشوفه ماتزحزح من مداي
إليْن اليوم ياصاح ابنده
وصوتي مايرده غير سربك ياطيور
الله لنا ..
الله لنا ..

غيوم و هالمطر ماجاني الليله
... ... ... وانا من غيبتك ياصاحبي شفني
أناظر ساعتي والغيم مل شيله
... ... ... ويتساقط مطر لكن يبي جفني
كذا يعني بردْ والعين تحكيله
... ... ... طلبتك يامدى أقرب شوي لفني

وانا عيني تبي من غيمتك لفحة
ترد النفس طير ..
تنده مداك ..

 

[محمد الغشام]

مره اخوي يقول لي ودنا نسوي مقلب بالوالد ..وعاد اخوي مخربها طبعاً وانا عاقل
قلت له شلون تسوي ولمن يدري قسم يصير راسك ملعب كوره..
قال ماعليك مايدري
قلت بكيفك ومن بعدها بكم يوم جاني ويقول لي ابي اسوي مقلب اليوم بابوي
قلت بكيفك ..
وقال الطريقه اخوي عن المقلب
وانا رحت وجلست عند ابوي بالمجلس ومافيه هذاك الوقت الا انا بالمجلس وابوي
لمن دق جوال ابوي ..ابوي رد الا صوت البنت اللي يقرقع وابوي يتلعثم..لأني جنبه
وقال اصبر شوي للبنت وانا كني مدري شسالفه
وقالي محمد روح داخل وجيب لي ماء
واروح لين غرفه اخوي ..ولقيته مع ولد عمي وولد عمي يقلد صوت بنت هههههههه
ويسولف مع ابوي وابوي داش جو ويقول ما اصلحلك الله يهديج انا انسان متزوج وعندي عيال وخافي من ربج
ومن السوالف وطايح نصايح ابوي
وولد عمي خربها ويقول ودي اقابلك قلي متى وراح اجيك لو في بيتك وانا احبك واعرفك وساكن بالمكان الفلاني
ابوي تلعثم وراح فيها يقول وش الناس هذولا
المهم ابوي شاف مانفع النصايح وقام يقول خلينا نتعرف ويصير خير.
وقال ولد عمي على انه صوت بنت اوكيه ادق عليك بعد ربع ساعه وقال اوكيه
وانزل انا واخوي وولد عمي لمجلس ابوي ع1
وابوي وده يصرفنا ..
وياخذ الجوال اخوي من ولد عمي ويدق على ابوي من جنب المركه ومغطي الجوال يبي يوهق ابوي
وابوي يعطي مشغول
ودق ثاني مره ويرد ابوي وكشفنا
طبعاً ابوي ناظرلي وقلت فهيد مو انا وكعيت
اخوي فهيد شهرين مايكلمني مدري شفيه

 

[محمد الغشام]

شكُراً للمصممه عاليه هاشمْ على رسمها لخربشاتيْ المتواضعه ,.





و



و




و

 

[محمد الغشام]

اذكر مره كان عندنا مخيم في النسيم بالرياض قبل لايشيلون الملاعب
كان المخيم لنا وللجماعه .. وكنت في اول متوسط .. وكل يوم اربعاء وخميس نسهر بالمخيم
ولأنه قريب من البيت اروح مشي ..والمشكله الطريق يخرع في الليل لأن فيه كلاب الله يكرمكم
لمن جيت بروح المخيم ..دورت احد يروح معي مافيه ومدة المشوار 15 دقيقه وعليها شوي ..
المهم مشيت واقمز الطعس وكمل وخلوها على ربكم واسمع [صوت كلاب ]
عاد انا دايم امشي عادي وما أخاف لكن هذاك اليوم اشوف مثل الغبار واصوات قلت بس جتني وانا قبلها بيوم شايف فلم مرعب
وباقي على المخيم طعسين وأركض وأركض وأركض وأقمز الطعوس بشي خيالي
لو أني في أولمبياد سيدني كان شرفت البلد
ولمن وصلت الدكه : موجود ابوي وعمي قالو لي شفيك قلت كلب قالو شفيك قلت : كلب وبخوها ضحك وانا صار وجهي بنفسجي لمدة يومين وأمي تجيب ماء مقري وزيت مقري وتقرى علي
طبعاً أحلى أم بالدنيا :

يمكن نكمل

 

[محمد الغشام]

فواز الغشام
كم أعشق جلساتك ياغالي
كم الرياض قاسي في بعادك ,
كن قريباً منيْ ..

أسمع .. أسمع : )

 

[محمد الغشام]

,

,


الحسن له باب الجراح و تولّم
... ... ... هذي سواليف الفرح للفرح صح
ان جيتني تسأل عن ايامي تعلّم
... ... ... انا ترى في غيبتك بس ابجرح

,,
,

 

[محمد الغشام]

:
:
مشتاق لي أكثر من اللازم
... ... ... مشتاق لك أكثر من أحساسي
ودّي أعيشك دم عشان الدم
... ... ... يلازم الانفاس في كاسي
عرفتك البارح لأنّ الهم
... ... ... يمشي على راسي على راسي
:
:

 

[محمد الغشام]

..
وابتدا الجرح العميق
لو بدينا
..! او عطينا
من حنين الورد من ضمّك علينا
لا تقول الليل هذا يمشي ابْدوبه عنا
وقتك .. عنا وقتي شعورٍ مانْتهينا
انتي اجمل
.. من دهاليز الغياب
وانتي اجمل
.. من مسافات الليال
وانتي اجمل
من طريق ٍ كل ما هب النسيم اللي على وجهك وقال
... ... انتي نبضي كل ماجتك السوالف من على حضني وقلت
وش بقى غيرك على وجه السفوح وما عذرت
... ... وش بقى غيرك على بعض الغياب و ما حضرت
كل مايطري عليك
الشفا لا عضّ من طرف الاصابع والترف
وآنا على حضنك غفيت
وماسكرتْ..