منتديات أبعاد أدبية - الرسائل الواردة =1

وقلوبكم البيضاء التي تعرف سر كل غياب..
تشدني كثيرا إلى هنا..

:
مدخل:

يا حسافة..
لمن يكون التعب..
مو على قد المسافة..
ويا مسافة..
لا تمنيت العتب..
مو على قد الحسافة...!.

:

( 1 )

سبقت الموعد المنسي.. وتسبق قلبي آماله.. ويسبقني الأمل قدام..
سبقته.. موعدي المنسي.. بنظرة حيــــــــــل مختاله.. ولهفة طفل ما ينلام..

( 2 )

سبقت الموعد المنسي.. وأدور عن مكان بعيـــــــــــــــــــد.. بيجمعني أنا وإنتي..
بيبعدنا عن الإنظار.. يشبه كثرة أعذارك..
وأدور عن ركن موجود.. شبه مفقود.. وكنه كثرة الأحلام..
بقولك فيه انا أحبك.. وأداعب لهفة كفوفك..
وأقولك ليه تأخرتي..
وأنا أدري ما تأخرتي..
بقولك بدري طال عمرك.. عسى بس كنتي تتغلين..
وأنا أتخيل.. ( بتبتسمين )..
وأقولك: يااااه هالبسمة.. تنور لي ظلام سنين..
وأبنثر لك ورق شعري..
سوالف حبي العذري..
وأقولك: هذي في لونك.. وهذي فـ فتنة عيونك..
وهذي يوم زعلتك.. وهذي يوم راضيتك..
وهذي يوم صارحتك.. إني حيل مجنونك..
ويمر الوقت ب****نا..
ولا بتخلص سوالفنا..
ولا ظني الفرح بينام...!.

( 3 )

سبقت الموعد المنسي..
رجيت الورد لا يذبل..
رجيت الوقت لا يرحل..
صرخت بوجهه.. قلتله:
"إنت إشفيك مستعجل"..
وأنا استنى.. وأنا اتمنى..
عسى تتحقق الأحلام..

( 4 )

سبقت الموعد المنسي..
وأنا أترقب لميعادي..
تنور شاشة الجوال..
رسائل واردة = 1..

"حبيبي يا بعد عمري..
مدري كيف أبتعذر..
بس مقدر أجيك اليوم..
كثيرة جايه الأيام"..!!
ومدري كانت رسالة..
ولا حكم بالإعدام.!!!

( 5 )

على كل حال..
بداري موعدي المنسي..
ولا كني سبقته يوم.. ولا كنك تغيبتي..
بغادر موعدي المنسي..
بنظرة حيــــــــل مكسورة.. ودمعة طفل ما ينلام..!!
وخطواتي بتتساءل..:
ألا يا موعدي المنسي..
ألا يا حبي العذري..
متى تصدق مواعيدك؟!..
متى تطلق تناهيدك؟!..
متى تتنهد البسمة على شفاتي.. ولا تنلام؟!..
متى باللــــــــــــه قوليلي..
متى تتحقق الأحلام.!.

03
ولـــيـد,,,