ايش بلاه الليل؟

[منتهى القريش]

طريق أطول
من الأحلام
كأنه ليل من التنهيد
كأنه ساحه مزروعه
كثير اشواك
وانا رجليني عريانه
في عز القيض بردانه
وذا صوتي.. صدى بحه
عليه من الحزن مسحه
تايه .. حاير .. ومكسور
كأنه خاطر الأيتام

ايشبلاه الليل
من كم عام
عتمه .. وتكة الساعه
كثير ارواح مرتاعه
يدثرها بقايا همس
وذكرى أمس
كأن اليوم .. صار اطول
كل شي مو مثل أول
كأن الناس.. بعض انفاس
باتت ليلها تحلم.. يروح الهم
وانا جفني يعاندني ..
أبد م ينام

أتبعثر أنا وظلي
هذاك اللي
على الجدران متكسر
واتحسر
أودع آخر احزاني .. على بابي
ولكني .. اشوف الهم
يطرز ريحة اغيابي

ولا يرحل .. بقايا الليل
وتبقى فرحتي أطياف
تضمها وحشتي بالحيل
ويطفيني الوجع قنديل
ينام الحلم .. يكسرني
أدورني
ألاقيني مجرد وهم
يضيع بزحمة الأوهام

..................................

طريقي يطول
اتبعثر .. أنا وصبري
فتحت الهم
ثلاث ابواب وشباكين
جهات اربع
فتحت الخامسه صدري

وكنت ادري
ينام الليل
على كف السهر واتعب
وجفني م الأرق يشرب
حرارة دمعة المحروم
وانا والنوم
نضيع بزحمتي وانعس
ادثر همي بعيوني
اريد انام .. واظنوني
تصيح وسادتي .. بدري

أنا أذكر
هذاك اول
كان أجمل
كانت بسمتي كالما
كان الحزن كف اعمي
تدور في الفضا جدران
كثير احزان
تطيح .. تقوم .. ما تدري

هذاك اول
كنت ارسم
على جدران حارتنا .. طفولتنا
تلونها براءتنا
وكنت احمل .. هموم الوقت
طبشوره وسبوره
حقيبة مدرسه واشعار
كثير اسرار
تنسيني معاني اسمي
أعبر فوقها وهمي
وانسى كم سنه بعمري

كانت جارتي (منوه)
مثل غنوه
أحبها كنت .. رغم كل شي
رغم الفارق الملموس في التفكير
كانت غير
كنا نملا كل داعوس
ضحكه والصدى فانوس
وراحت جارتي منوه
ومعاها راح أحلى وقت
من الأيام .. والأحلام في صغري

ايشبلاه الليل
طويل بالحيل
ايش بلاها الدنيا مقلوبه
ايش بلى الميزان
مالت كفته أحزان
ولو اسأل عن ال غابوا
يرد الصمت
ويصرخ داخلي حزني
أنا مدري .. أنا مدري

وحيث الهم
جهات اربع تحاصرني
فتحت الخامسه .. صدري