نصوص بلا أجنحة ..🪽🪽

[نوف الناصر]

•
‏

( الحنـين )


‏ تدري وش يعني الحنين ؟!
‏الحنين ..
‏ الطعنة اللي بخاصرة جرحي
‏وفقد الراحلين..!

‏•
‏ الحنين ..
‏ اللي رسمته..
‏في تفاصيل الغياب
‏وكان لوحة معلقة بقلبي الحزين..!

‏•
‏الحنين ..
‏الطفلة
‏اللي نامت بصدرك..
‏تدوّر بك
‏عناق وكلمتين..

‏•
‏واليتيم ..
‏اللي حضن صورة أبوه
‏ونام يبكي ..
‏خايف إنه ينقطع حبل الوتين..!

‏•
‏ واني كل لحظة أموت..
‏ واختنق..
‏وانا أدور عن بقايا أكسجين.!
‏من ايدين اللي طعن قلبي غيابه..
‏وانا واقف عند بابه..
‏أنتظر حتى أموت من الحزن
‏ اللي فطر قلبي..
‏و رمى بي..
‏في دروب المتعبين..!

‏•
‏الحنين ..
‏إني بكيتك..
‏ وانت ماتدري عن اللهفة..
‏وعن الرجفة..
‏إذا ناديت اسمي
‏اللي كتبته..
‏بين حزن ودمعتين..!

‏•
‏واني في لحظة خسرتك..!
‏وانك أجمل
‏من حقول الياسمين..
‏ومن مواعيد الحبايب ..
‏والأغاني ..
‏وانك أطهر من
‏قلوب اطفال ..
‏وابيض من
‏نوايا الطيبين ..!

‏•
‏انت ماتدري وش اللي خلّفه فيني الحنين ؟؟!!

‏قلبي المتعب ذِبَحْه البرد تكفا..
‏مِدِّلي دافي كفوفك ودّي أدفا..
‏غطّني في (معطف) إحساسك
‏بحِضْنِكْ..
‏خلْ صدرك لي وطن ما هو بْمنفى..
‏ثم سمّعني قديمك من قصايد..
‏عالقة في الذاكرة واتركني اغفى..

‏وانت فيها ..
‏تكفا دورني هناك..
‏يمكن إني عالقة
‏ما بين شكك واليقين..!

‏•
‏الحنين ..
‏إني أموت..
‏المهم إنك تعيش..
‏الحنين إني احبك..
‏والله إنه حب صادق ما هو طيش..!
‏ آه لو أتباهى
‏قدّيش أنا احبك..
‏كان تِتْماهى
‏مع روحي وتسألني بلهفة :
‏( إنتي وين ؟!! )

‏•
‏ممكن اسأل :
‏( إنت وين ؟! )
‏في دروب المتعبين ؟!
‏والا في قلبي الحزين ؟!
‏والا متعلّق على حبل الوتين ؟!
‏والا عالق بين شكّي واليقين !

‏•
‏إرجع لصدري بغنّيلك ( أحبك )*:

‏يا (حبيبي تدري شِلّي في
‏غيابك حيل تعّبْني؟!
‏أحسّك طرت من إيدي كذا
‏فجأة بِغَمْضِةْ عين)* !

‏تكفا تعبني الحنين..
‏والله تعبني الحنين..


‏

‏*أغنية ( أحبك ) لحسين الجسمي
‏.


‏ 1 سبتمبر 2023


ابعاد

www.ab33ad.com/vb/showthread.php?t=44353


‏تويتر

https://x.com/too_simple_girl/status...-Zv_esWEdZ8POQ

 

[نوف الناصر]

‏

تعب..! واستنزِف جْروحي واعوّدني على الكِتمان
واشوف انّ الشّعر أكبر من الكِتمان واحْزانه

أفضفض للورق واكتب واقول ان الحكي أغصان
يرفرف للسّما سربٍ يطير ويترك اغصانه

كتبت ‏وما معي غير القصايد والشّعور ( انسان )
يحاول يكسر بْخاطر قصيد .. ويكسر اوزانه

ظما..! واتلمّس عْروق الغمام بْكفّي الظميان
واحاول ألْمِس كْفوفه و افكّ ازرار قمصانه

وحيدة..! مامعي حاجة سوى الخيبات والأحزان
أخبّيهم بكرّاسي .. وتنبت شِعر باحْضانه

غريبة..! فِـ الدروب اللي تسولف لي عن الأوطان
زهابي دمعتين .. و جرح قلبٍ ملّ خذلانه

دموعي كحلة عْيوني .. و حزني للفرح فستان
أشوف مرايتي وابكي .. وامسّح دمع بارْدانه

تعال انفث على قلبي .. تعال وسمّ بالرحمن
طلبتك يالفرح تكفا على شاني .. على شانه

عجزت اكتب .. وقلت ارسم حكاياتي بلا ألوان
وبيت. . وغرفة .. ودرفة .. واعلّقها بجدرانه

تعبت استنزف جروحي واعوّدني على الحرمان
واشوف ان الألم أكبر ولو حاولت كتمانه

أنا ما عاد اسولف للورق عن قصة الخذلان
أنا صرت احرق أوراق الشِّعر واقصّ جنحانه

‏
‏

نوفمبر 2023

تويتر

https://x.com/too_simple_girl/status...691991631?s=46

 

[نوف الناصر]

•

أما قبل/
عن الشعر أتحدّث..
•

‏

كانت الساعة قصيد إلاّ شطـر..
صارت الساعة قصيدة مذهلة!

وانزويت اكتب تفاصيل المطر
أبذر حروفي .... وتنبت سنبلة

واتزيّن للشِّعر .. .. ليته نِطَر….!!
كان شاف الزين ( حرف ) ومكحلة

والدفاتـر لو تمـاري بَهْ سطـر
كان تكتب في سطوره …أنْبَله

والقصـايد لو يغـرّقها عطـر
المشاعر..في شعرها* تجدله

والقلوب اللي تحب وتنفطر
يا شِعر إقرا عليها البسملة !

والشعور اللي تنامى وانشطر..
منهو غير القاف يقدر يزهله؟!

والسؤال اللي على بالي خطـر :
ليه دايم أكذب الشعر أجمله؟!

•

•

* شَعَرْها أو شِعِرْها
اقرأوها كما تشاؤون !


أما بعد/
تباً لقافية الصدر ..


2 يناير 2024

 

[نوف الناصر]

‏

‏كان هذا الليل يورق فوق جذع النهار
‏كان يتشكّل قصيد وْ أمنيات وْ حنين

‏كان صوتك يهدل بْقلبي حمام وْ منار
‏قبْلَ اتوه بْإرتباك النّوته وِ النجمتين

‏كنت الحَّن أغنيات بْنغمة الإنكسار
‏كنت اغنّي وَ استفزِّ النّاي وِ العازفين

‏كنْت ارتّبْ منْ احاسيسي ملامح ْاطار
‏واحْبسَ الَّلحْظة فـ ِصورة ترْتسمْ من يدين

‏الْغيابِ الّلي تَركْ لي مفْترقْ اخْتيار
‏بينِ توْديعك وبينِ الْموتِ بسْ خطْوتين

‏صرت اسولف لك عنِ شْعوري بكلّ اختصار
‏واختزل لك إرتباكي وَ اسرد حْكايتين

‏لو ألبِّس حزني الضّافي ثياب الكِبار
‏يمكن اخفي عبرتي في كمِّ شِعري الحزين

‏كنّ طعم الذكريات بْـ فمّي مثل الغبار
‏و الهماج .. الّلي تحدّر من هنا دمعتين

‏يمكن تْخون المسافة بوصلةْ الِانتظار
‏يمكن يْمدّ المدى صوتهْ .. صدى راحلين

‏والله اني لو أعبِّد لك ضلوعي مسار
‏تكْسر ضلوعي وتعْبر ترتحل مدري وين ؟!!

‏تدري لو أزرع مِنَ اعذارك ورود اعتذار!!
‏يْتيبَّس قبْلِ ما يزهر بـِ عذرٍ سمين!!

‏واتوجَّس .. واتردَّد .. باتِّخاذِ القرار
‏بين شكِّ الإتِّساع وْ بين ضيق اليقين

‏ممكن نْودِّع بعضْنا في محطَّة قطار ؟!
‏ممكن نْلوِّح … نودِّع ذكريات السنين ؟!

‏لوْ أهزِّ الليل يِتْساقط أرق فـِ النهار
‏أوْ أهزِّ الصبح يِتْساقط قلق معْ حنين
‏

18 فبراير 2024

تويتر

https://x.com/too_simple_girl/status...018312807?s=46

 

[نوف الناصر]

هذا المـسا أعـمى
عـكّازتـه ديجــور.!

كنّ الصّبـاح ...الما
بـلّل ثيـابـه نــور .!

فـ الذاكـرة أســما
غابت وغاب حْضور

كـان الغنــاء و ( مـا
تِ )بْحنجرة عصفور

في شِـعري الأسـمى
كان ارتكاب ( بْحور )

في دفتـري يـهـمى
بين ارتبـاك سْـطور

ليته سـحاب .. وما
كان الظـما والبـور!

مـن يشربـه يظـما
مـن يتركـه مكسور

أقلامـنا بكمــا
إحساسنا مـبتور

عـن حـبنا .. مـهما
نكتب..شِعر مهدور

هذا الشـعور ادْمى
مْنِ الحنين ..شْعور

ما كنتَ انا ( سلمى)
في شِـعره المـغرور

ماكـنت أنـا ظـلما
كنت بْصباحه نـور

*الماء
9 فبراير 2024


ابعاد

www.ab33ad.com/vb/showthread.php?t=44439


تويتر

https://x.com/too_simple_girl/status...416860245?s=46

 

[نوف الناصر]

•
[ الغرفـة ]

•
‏مدخل/..
‏مابين ( شرفة ) …. و ( الشرفة ) شاعرة تسبر أغوار الذات ..!
‏•

‏

يجرّ الحديث اطراف غيمة على شرفة
تبلّل طرف صوتي على مسمع احلامي

و تاخذني بْـ يدّي احاسيس منجرفة
لغرفة كئيبة جوّها ضيق مِتْنامي !

هنا بابها مُغْلَق بلا قفْل أو درفة..!
يناظر لساعة تفترش حائط ايامي

أراقب عقاربها كأنّ العُمُر طُرفة
على ناصية لحظة تلاشت من اعوامي

تمرّ الدقايق بين تغميضة و طَرفة..!
مثل ما يمرّ الضحك في خانة اوهامي

هذاك الجدار يحدّق بْآخر الغرفة
و كل الزوايا حزْنها فيه مِتْرامي

أشبّه على ظلّ يْتمايل على طَرفه..!
وامرّر أصابع حيرتي و ارسم اقدامي

أدوّر لـ سقف الشعر في داخلي صِرفة
و احاول اقصّ الحَبْل* من فكرة إلهامي

و يغريني الكرسي أوقّف على حَرفه
أخاف آتعلّق بالحَبِلْ واشهد اعدامي

و ذكرى تسهّرني على وجه ماعرفه
أغنّي لها تهويدة الذاكرة : ( نامي )

أسولف لدمعي و انْ تكِابَر على ذرفه
حديث السّتاير للنّوافذ لـِ أنسامي

ويربكني شْعوري إذا جيت ابَقْتَرْفه
وتتركني افكاري على مفرق حْطامي

أحطّ بْجيوب الذاكرة ( ذاتي ) بـْ ظرفه
و احيك اغترابي في تفاصيل هندامي

أبعثر ورق أبيض يدوّر على حرفه
و ادوس الورق و اهرب من افكاري .. اقلامي

و الاقيني اتجاذب حديثي مع الشّرفة
وابلّل طرف صوتي على غيمة احلامي


‏

16 ابريل 2024
‏•
‏*حبل الأفكار
‏•
‏حقوق التصميم محفوظة
‏•

تويتر

https://x.com/too_simple_girl/status...413660041?s=46

ابعاد

https://www.ab33ad.com/vb/showthread.php?t=44406