ماجفيتك عبث..

[حسام المجلاد]

.
.
.

ماجفيتك عبث، ماكنت مختار
يشهد الله ودموعي شهيده

انك بنظرة المتغرّب الدار
وانك اغلى المكاسب في رصيده

اشعلي بالملام بقلبي النار
واعتبي قدّ شوقك يافريده

عاندي يمطر لساني لك اعذار
ماعشقتك سوى لأنك عنيده

غبت مكره واخذت الصمت مشوار
لو علاقتك مَع روحي وطيده

غبت.. لإني لمحت بيوم ثرثار
يمتهنك لرضى ناسٍ بليده

يقصد حمار ويصفق له حمار
لين ياغاليه صرتي زهيده

غبت.. من شفت عبد القرش بك ثار
ثورة هْياط يشحذ فيك سيده

غبت.. من صرتي السلعة.. لتجّار
ما اعرفوا لذّتك على الحديده!!

ياقصيده وانا ماعَرْف وش صار
غير بإنّ الشعر سادوا عبيده

لاتضيقين.. توّ العزم ماخار
فدوتك ماضي العمر وجديده

والله إني بدمعي لا اكتب اشعار
لين ما وجهك الما يستعيده

وآخطب وِدّ مايغري من افكار
والكلام المكرّر.. ما اعيده

ما كتبتك وانا ابغى لفت الانظار
لارضيتي يكفي يا قصيده!