( فاهم غلط )

[علي المحمد]

في العصر الحجري سأل أحد الملاقيف مسناً حكيماً فقال له :

ماهو التفاؤل !!

فأجاب الرجل الحكيم بعد أن تنهد ونظر الى السماء :

التفاؤل يابني هو أن تنتظر زوجتك تخرج من السوق وانت مندبله كبدك بالسياره

ثم طأطأ الحكيم رأسه وسكت . وانتبه لغلامه وهو يوقع زير الماء على الأرض

فصرخ بوجهه قائلاً يادلخ ماتشوف




للأسف هذا الحكيم ( فاهم غلط )

ما يدري ان المرأة هي الشريان لحياته والإحتواء لشتاته و صحوة الإشراق لسباته .. ( وين أبعاد النثر الأدبي عني )

وهي اللي توكله و تشربه و تمد له كيسة الزباله ( محشومين ) مع أوراق المقاضي وهو طالع من البيت

و إذا رجع تدربي له أسطوانات الغاز الفاضيه عشان يعبيها

وغيرها من الأمور اللي تخلي الزوج يلطم و يشتكي لوسادته و وسادته تضحك عليه

وش فيها يا مجتمعنا الذكوري لو تحملنا حريمنا اذا تأخرو بالسوق

وش فيها لو غسلنا المواعين مع حريمنا وساعدناهم بالطبخ

على طاري غسل المواعين ترى غسل المواعين نقطة ضعف كل رجل ومعروف ان الرجال مستحيل يدخلون المطبخ

إلا إذا انفجرت سخانه أو شب غاز ومايدخلون إلا بعد الدفاع المدني ( إمحق رجال )

بصراحه يعني شينه نموت بمطبخ <<<<<<< مقاطعه حتى آخر رمق

لاتصدقون كلامي لأن رجالنا أبطال .. وسنعين ويدخلون المطبخ حتى لو ما انفجر شي ..

يعني ممكن نكلف على أنفسنا و ندخل المطبخ نزاعق و نهاوش على كاس منكسر ..

أو ناخذ لنا لفتين نتميلح قدام الشغاله الواحد يسوي نفسه يدور بياله

على الطاري ..

تحذير هام يا شباب :

انا غلطت مره و دخلت المطبخ بهدف التميلح ... ما دريت الا و القى الوالده واقفه فوق الثلاجه وحاطه قدر على راسها يعني ( خوذه ) و المكنسه في يدها يعني ( رمح ) .. عاد هذا كل اللي اذكره قبل لا يخيطون جبهتي



المستفاد من مما ذكر بعاليه

دلعو حريمكم ولا تفهمون الرجوله غلط

 

[علي المحمد]

عندما تتجدد الذكرى بقلوبنا ... وتعصف بنا رياح الحنين فنتذكر من نحبهم

تسقط من طهر العين دمعه ... تتلوها دمعه ... يتلوها تنهيده كصوت الرعد

نتذكرهم فنذهب الى حيث يمكن أن نجدهم فقد أضنانا البعد

وعند اللقاء يحلو فيمتو

<<<<<<<<<<<<<< برى المنتدى يا ماصل

( فيمتو طعم اللقاء )

الكل منا يعرف ان البنات يسوون شنبات بالفيمتو

واخر خبر وصلني ان بعض البنات من شدة العطش أول ما يأذن مو بس يسوون شنبات يسوون سكسوكه ( فديت اللخبطه )

فديت الأبضايات اللي شنباتهم حمراء ويقلدون معتز أقوى واحد بالحاره



بس مو هذا موضوعي اللي ابيكم فيه




هل تعرفون هذا الشخص الذي يظهر بالصوره

يقولون :

من كانت له بدايه محرقه ....... كانت له نهايه مشرقه

أتعرفون من هو هذا الشخص

هل تعلمون ماذا كان دوره بالحياة ، وكيف كانت خططه ، ومن يمثل ، وماهي مبادؤه !!

هل تعلمون ماهي إنجازته وكيف وصل الى ماهو عليه الآن ؟؟









.

.

.

.

.

.

.

.

.

بصراحه أنا ما أعرفه بس شكله فاهم





اللي حبيت أقوله... الرجال مخابر مو مظاهر ( لاتفهمون غلط )





برايفت :

تم تكبير الخط عشان اللي نظرهم ضعيف بأبعاد مراسليني يقولن لو سمحت كبر خطك

 

[علي المحمد]

للأسف

إكتشفت أن الأسماء على تعددها ما تغير شيء في الواقع

على سبيل المثال الوالد دايم يردد بيت شعر على سبيل الدعابه والتدليع :

أسميته علياً ليعلو ... تجري الرياح بما لاتشتهي السفن

عندنا واحد في الحارة اسمه ( جميل ) و هو لولا أسنانه ما عرفنا وجهه من قفاه

والبنغالي اللي يركب دشوش في الحاره اسمه ( فهيم ) و هو ما فيه أغبى منه

لو تدبجه بإسطوانة غاز على جبهته وإلا تمحطه بسلك مسجل ماراح يفهم

هذا غير إن ( يحيى ) ولد الجيران مات و هو عمره خمس سنوات في حادث سيكل شنيع

وولد جيراننا الثاني اسمه ( سعد ) حتى سيكل ما حصل له

بيني و بينكم واضحه الشغلة ...

و إلا كان كل ( سعودي ) صار سعيد

لا تفهموني غلط

بيجيني واحد يقول
لكل قاعدة شواذ و الدليل إن السودان ما فيها ولا واحد أبيض

لهذا الشخص أقول

عيالنا متمرمطين بسوق العمل ومالقو وظايف

ومعالي وزير العمل والعمال أقصى طموحه سعودة سوق الخضار واليموزينات

برايفت

إرفع راسك إنت سعودي غيرك ينقص وأنت تزودي

 

[علي المحمد]

عزوبي ومن رداة حظك البنات مو معطينك وجه و يطاردون المتزوجين

وجهك ( زين ) وشريحتك ( موبايلي ) ومايدق عليك الا امك توصيك تجيب المقاضي للبيت

أو يدق عليك أقوى واحد بالاستراحه يذكرك بالقطه عشان الفحم والمعسل

ويقول لك بنبره تخليك تنتفض ( لا تطب الإستراحه الا القطيه بجيبك )

جوالك ( E71 ) و ماخذه دين وبايع إستبنة سيارتك عشان تكمل قيمته

والرسايل اللي بجهازك كلها من ( الاتصالات السعوديه ) يشحذونك تسدد الفاتوره

سيارتك هوندا كورد دابل كبد ابوك لين شراها لك

و اذا قالو لك اهلك ودنا مشوار ... إبليس بكبره يتعوذ من أخلاقك

ترعد وتزبد وصوتك واصل آخر الدنيا والجيران يحسبونك منفذ عمليه انتحاريه بالبيت

نصيحتي لك إركد

ونغمة جوالك لوسمحت غيرها ... حاط لي اغنية ( ماعادك الا صغير ) واللي يغنيها خالد الملا بعد

والله من زين البرستيج مالعب في مخك الا انك ودك تعيش مثل ( هوامير الصحراء )

وانت لو تفحط ماتقدر تبني بيت شعر بالارض الفاضيه اللي جنب بيتكم



لا تفهمني غلط


أنا قصدي ( مد ايدك على قد لحافك )

واذا لقيت وحده بالدنيا تحبك وتموت فيك ( حب ايدك وجه وقفا )

وتأكد انها تحبك مو عشان جوالك ولا عشان سيارتك ولا عشان نغمة جوالك

و إذا انت مافيه أحد يحبك خلك مثلي فل والدينها لين ربي يرزقك بخبله قررت تبلا نفسها فيك




برايفت :

ياحبي المغرور ... ياللي دفاك شعور ... رد القمر للنور ... وأحلى العمر في وعد

 

[علي المحمد]

محمد ضابط برتبة نقيب

متواضع ... يلعب مع أطفال الحاره بالحديقه اللي جنب البيت ... ويساعد جارتهم العجوز نوره

و يشتري لها مقاضي البيت ... محمد حمامة مسجد وراعي صلاة وخير

اخوه الصغير فارس ماكمل دراسته وظيفته بأحد المواقع حارس ... وراتبه على قده وضعيف ...

فارس و محمد تربو جميع بنفس البيت

فارس متزوج وعنده بنتين ومحمد عزوبي عليه خساير أقصاد و دين

وبيوم من الأيام حصل تفجير

ارهاب وتدمير

وللأسف مات فارس !!!

وأصبح أمن الوطن والمواطن برقبة محمد دين

بعد التحري عن المفجر .... تم الاعلان عن اسمه الصريح

وام محمد وفارس من الصدمه تصيح

الانتحاري ولد اخوهم عبدالكريم

كان محبوب ورحيم ... و ... ضللوه ... و ... عن طريق الخير ابعدوه

لدروب المهالك

لذلك

اللي أبيكم تفهمونه بسيط

مهما علا صوت الضلال والتكفير

حب الوطن خير

مايغلبه شر ومايساوم به أحد

إلا اللي قلبه مريض ممتلي غيض وحسد

كل عام وانت ياوطنا بخير



برايفت :

انتي مامثلك بهالدنيا بلد


http://www.6rbtop.com/library/resources/M7ammad_3abdu/Collection/listen/13260_hi.ram

 

[علي المحمد]

( سدوس ) أشهر قطو بالناصريه

اللون : أسود

العمر : يقولون عايش من ايام عبدالحيم وام كلثوم

الهوايه : اجتياز طريق الملك فهد والدائري الشرقي برعونه وشل الحركه المروريه وترويع بنات جامعة عليشه والتسدح على سيارات الشيوخ

الألقاب : باقيرا الناصريه ... وحش عليشه ... ماتادور الدائري الشرقي ...


يستيقظ سدوس من نومه كعادته عند الساعه السابعه والنصف صباح كل يوم

بعد ان تأتيه القذيفه من حذاء السوداني عبدالباري وغالباً ماتستقر في جنبه او على رقبته والتي

بدأت تفقد مرونتها بالحركه بسبب قذائف عبدالباري الصاروخيه ...

سدوس تستاهل مايجيك لانك تنام فوق ( البانورما ) سيارة طويل العمر ( مرفه عمرك يالخال )

هذا القط تسبب في جنون هذا السوداني المسكين ...الذي تعرض للخصم من مرتبه عدة مرات

من عمه الذي تذمر كثيراً من نوم سدوس المتكرر على سيارته



ذات يوم وعندما كنت خارجا من المنزل متجها الى حي الوزارات بالرياض

لحظور مقابله شخصيه كانت بالنسبه لي مفترق طرق في حياتي العمليه وتحسباً لاي ظرف طاريء

فقد خرجت من المنزل قبل الموعد بـ 3 ساعات وبعد اجتيازي لنصف المسافه

واذا بالطريق متوقف والسيارات لا تتحرك والحركه المروريه مشلوله تماما حتى في الجهه الاخرى

من الطريق

يارب يكون في الأمر خير

وبعد وقت ليس بالقصير بدأت السيارات بالحركه وانفك الاختناق قليلا

فأيقنت بأن كل هذا التأخير لحادث شنيع وكنت امني نفسي بأن لا ارى مصابين او وفيات

وبعد ان اقتربت من موقع الحادث واذا بي ارى الحشود والجماهير والمتفرجين

فقلت في نفسي الله يستر لا يكون باص بنات منقلب والا رجل مرور مدعوس

وبعد ان اقتربت اصابتني الدهشه وانا ارى جموع من الفضوليين يشاهدون القط

سدوس بعد ان فارق الحياة ويقومون بتصويره بالجوالات

فأسقط في يدي و كدت ان افقد ماتبقى من عقلي

سدوس ليت عبدالباري ذابحك والا جايب لك شلل رباعي بجزمته

ياسدوس انت ماتدري ان عندنا شعب الله يحلل الـ بابارتزي ( مصورين المشاهير) عندهم

والمصيبه اللي مايصور يتفرج



لا تفهموني غلط



إحنا شعب راقي ونحب نساعد الآخرين حتى الحيوانات فينا رأفه عليهم

بس ودي اعرف متى يجي اليوم اللي تتنظم فيه الحركه المروريه بالرياض

وابي اعرف كمان متى نرتاح من ظاهرة التجمهر والفضول اللامبرر

ياناس اموت قهر لما يتعطل الطريق عشان اثنين متصادمين والحادث بسيط ومافيه اي تلفيات كبيره

ونلقاهم واقفين ينتظرون المرور عشان ورقة إصلاح

والاف الاشخاص وراهم متعطلين عن اعمالهم ومدارسهم واختباراتهم



برايفت :

الى رجال المرور نقدر جهودكم وحرصكم على تنظيم الحركه المروريه

اتمنى منكم في وقت الذروه تداومون بدراجات ناريه عشان توصولون لأماكن الحوادث

بسهوله

لانكم وبكل صراحه انتم بسيارتكم تسببون فوضى وزحمه على الفاضي

 

[علي المحمد]

حمد

صاحب العباره الشهيره على جدار الذكريات اللي بحارتهم

( لولاك يامنيره ولعت بالديره )

حمد

إذا إنهزم الهلال ... وقامو أخوياه يدقون على جواله ...

وقف سيارته جنب أقرب رصيف ... و حوَل جواله على أي جوال مكتوب على لوحة خياط

أو مكتب عقار أو شقق مفروشه ... حمد مايبي دوشه


حمد

ماتزوج ... و ينحرق قلبه اذا قال له شخص إنت تحب الهلال أكثر من منيره



للأسف ابوها نصراوي وعشانه هلالي من البنت حرموه ... مازوجوه !!!

معقوله !!!

معقوله !!!


وش اللي بالدنيا يصير ؟؟؟





لا تفهموني غلط


حمد ( مواطن ) حب منيره وبعد أربع سنين اعترفت له إنها ( سمو أميره )

 

[علي المحمد]

عندما تنسحق مشاعر قلبك وكأن قطار مدينة الضباب "لندن" قد مر من فوقها وهو في طريقه الى "مانشستر"

وعندما تشعر بالخذلان من هذا القطار الذي لم يسحق المتبقي من مشاعر في عقلك الرافض بشده لواقع انك لست الا مجرد أخ في نظرها

فاعلم بانك لست الا شخص كان يجب ان يدهسك القطار لانك لاتجيد التعامل مع عقلك الذي يستطيع توجيه قلبك حتى وان رفض لفرط عاطفته


الغريب في الامر ان امنيتي عندما كنت طفلا هي ان أصبح سائق قطار

امنيه غريبه لم يتمناها الكثير من الاطفال ... وكان نصيبي من هذه الامنيه

رحلات مع ابي وامي من الرياض الى المنطقه الشرقيه بواسطته

كانت هذه الرحلات ترسم على ملامحي الفرح وتجلب لي السعاده

مع مرور الوقت لم تعد امنيتي الصغيره تعني لي شيئا ولم اعد اعشق القطار ولم يأخذني الحنين الى صوته

ولازلت اعترف بأن أول من إخترق قلبي ليوقضه من سباته العاطفي هو الماجد عندما ردد اغنيته الشهيره ( المسافر راح )

يالله ياقلبي سرينا ... ضاقت الدنيا علينا ... القطار وفاتنا ... والمسافر راح



قطار العمر رحله مررت منها بثلاثين محطه ولازلت وحيدا ... رغم يقيني ان القطار قريبا سيتوقف عند محطة العمر الأخيره

فقط سأخبرك بأني سأكون بخير حتى وان ضللت وحيداً

"أحبك"


http://www.6rbtop.com/library/resources/Rashid_El-Majed/Collection/listen/9466_hi.ram