امضيت عمري

[نايف المالكي]

امضيت عمري اجزي الطيب بالطيب
ما يوم جازيت الردى .. بالردية


ودمح الخطا شيمه ولا هو من العيب
ترك الكثير .. من الامور الدنية


طبع الردى .. ماهو لمثلي مكاسيب
ولا ضاع حقً عند رب البرية


فعل به المعروف .. يرقى المراقيب
ورد الخطية .. بالخطا جاهلية


خلك مع المعروف .. تجني منه طيب
يبقى وتبقى بذرته سرمدية


وخلك جبل .. ما حركته الهباهيب
والعز والناموس عندك هوية


واحذرك ثنتين فيهن عذاريب
فعل الخنا .. تنبذه نفسً سوية


ونقل الحكي .. ما فيه شكٍ ولا ريب
سمً تجرعته .. مرار ابيدية


كلما تذكر صاحبٍ لي ورى الغيب
جريت صوتي بالحروف العذية


عامين انا وياه حبٍ بــ تهذيب
واليوم تبكيله حروف ابجدية


وين انت ياللي حاميات اللواهيب
عقبك كوت قلبي ثمانين كية



والقلب من بعد الهنا والتراحيب
عقبك غدى رثٍ خرابٍ نسية


والحال عقبك وصف من دون ترتيب
يومي سراب وليلتي جرهدية


ياخاطري مالك عذر في المواجيب
دام الجروح مقدمه لك هدية


ليت الهوى .. في دنيتي ماله نصيب
ولا له بقلبي عروقً .. ندية


شوقي نثرت هم فوق المكاتيب
وبطى الجواب وجمرة الشوق حية


مدري عن آمالي ليا داهم الشيب
تبقى معى .. ولا تموت بروية