صمت وضياع

[نعيم الجشعمي]

ياللي بداياتك تعيش بخاطري
اجمل هوى يوم هويت
فاكر حبيبي لو نسيت ؟؟
ان كنت ناسي لا تظن
اني اودك تفتكر
لا تعتقد اني احبك من جديد
او خاطري لك ينكسر
ابعترف اني هويت
وابيك لو مره تجيني وتعترف
انك بديت
ابعترف ان الرسايل سطرت احلى جمل
عطرتها بعطر الخزامى والنفل
رسمتها ورده على شاطي نهر
صورتها فكره على ومضة قمر
غلفتها بلون الربيع
وارسلتها بسمة على شفة طفل
واجلس مع حلمي الجديد
فوق السحاب
وطافت سنين من العمر
الشمع ذاب من الحنين
والطير باغصانه سجين
صرت ابتعد
وصرت اتمنى ابتعد اكثر ولا اشوفك بعد
ابعترف اني هويت
وابيك لو مره تجيني وتعترف
انك بديت
ياللي عشقت الصمت ما عندك نظر
تبقى على مر السنين يا هاجري
مالك فخر
ياللي عشقت الصمت ما ودك تمر ؟؟
يمكن غرورك يلتهي بلحظه
وتقدر تعتذر
لا يا حبيبي لا تمر..!
ولا تحاول تعتذر
في خاطري مالك عذر
لو تعتذر كيف السماح ؟؟
والطير مكسور الجناح
والطعنه في وسط الظهر ؟؟
صعبه على نظرة عيونك تعتذر
وصعبه اسامح او ادوَر لك عذر
ابعترف اني هويت
وابيك لو مره تجيني وتعترف
انك بديت ..

 

[عبدالله صلال العساف]

من الجميل
ان تشرق حروفك هنا
وتكون من ظمن منتدانا الرائع
نص جميل
من شاعر اجمل
صح كلك ايهالعذب

 

[عبدالإله المالك]

غنائية الكلمات وجميل صياغتها متميزة

روح الشعر ترفرف عاليا هنا

حييت يا نعيم

 

[ريانة العود]

الله الله الله جميله...راق لي بوحك
سلمت استاذنعيم

 

[وائل فهد]

نعيم الجشعمي
سعدت بمصافحه هذا النص
دام حضورك وتواصلك
كن بخير

 

[صالح العجيمي]

رسمتها
ورده على شاطي نهر

صورتها
فكره على ومضة قمر

غلفتها بلون الربيع
وارسلتها بسمة على شفة طفل

•
•
•

نعيم الجشعمي ....

سلمت اناملك على هذا البوح الرائع ...

فكره وحرف وصوره ...

نص رائع وراقي كـ حضورك أخي نعيم ..

تقبل مروري ..

 

[ميــرال]

شعر وحضور يستحق الثناء
الف شكرا لأنك هنا