تخيّلتك :

[الهنوف بنت خالد]

مدخل :

ملاني الفرْح بـ قدومه ..
و زيّن موعده عمري ..
عرفت إن الأمل حلم ٍ ..
يحقّق هـ الصبر دعواه .. !

قبل عامين أنتظرك تنوّر مسكنك ب حشاي ،
ــــــــ وجودك مرتبط فيني وانا اتمناك و أعاني
تخيّلتك : تناديني بـ ( ماما ) وتبتسم دنياي
ــــــــ فـ عز الليل تشغلني لجل تدفا بأحضاني
بـ لهفة قلب متشفّق يبيك ودمعتي ( دعواي )
ــــــــ يارب ارزقني بـ طفل ٍبكاهـ يزلزل أركاني
ياربي : ما أبي أصبح وحيدة بلا سند ويَّاي
ــــــــ صبرت وطالبه منّك : تطفّي كل نيراني !
بدا نبضه يدفّيني وجوّا القلب أحسّه مْعاي !
ــــــــ وطول الوقت : افكر في إسم يرويه شرياني..
يقاسمني بأنفاسي ويشاركني بـ شرب الماي !
ــــــــ بديت آحس بالدنيا | و أعاند كلّ أحزاني ،
أنا ماهمني جِنسه كثر ما همّني : بـِ الجاي
ــــــــ تمام الخُلق والخِلقه و بِرَّه يوم يلقاني !
متى وعدك ؟ يا ديسمبر
متى بس تقترب لـِ خْطاي ..؟
حناني يطلبك تسرع ، عشان أنساها أشجاني !

مخرج :

يا عُمر توّي أعيشه ،
لوَّن إحساس ٍبـ صدري ..
وصرت أتمنّى لقاهـ ..!
عدٍّي يا وقتي و جيبه ،
قرِّب أحلى ايام عمري ،
خلِّني أحيا معاهـ !

 

[عبدالله عوجان]

الهنوف

صح لسانك

اللهم اجعل الخيال واقع

 

[ميــرال]

شعرت بكِ واقسم بأني بكيت ياالهنوف

 

[نايف السميري]

.
.
احساس عالي وانساني يسكن هذا الشعر
وهذه الروح ..!
.
.
رائعه / الهنوف ..
.
.


تحاياي

 

[عبدالله العويمر]

أسْأل الله أن يَرْزُقَك ِ مَايَقر عَيْنك

الهَنُوف
نَص ولَج الرّوح ، والله

دُمْت ِ

 

[خالد صالح الحربي]

:
لا يَكْتُب هذِه القَصِيدَة إلاّ إمْرأة ، لا أقٌول ذلك بسبب موضوعها أبداً .
بَل لأنّ روحها أنثويّة ورؤيتها أنثويّة تَوَغّلها أنثويّ وأنتظارها أنثويّ أيضاً .
كُلّ ما فيها يوحي بتاء تأنيث يَركُل أيّ شيء رِجَالي بـِ.. قَلَمِه !
مع أنّ هذه الأمنيَة لن تتحَقّق بمعزلٍ عن ذلك الرَّجُل .
شُكراً لكِ / يابنت خالد .

 

[نجلاء الشريف]

الهنواف بنت خالد

نص صادق يستثير روح كل أنثى .. ولا يوجد أجمل من أحساس الأمومه

اسأل الله أن يتمم لك على خير يالغلا دمتِ في رعاية الله

 

[خالد العلي]

.
.
.
أدعو الله أن يجعل الجنة تحت اقدامك ..

















آآآآآآآآآآآآآآمين