نصوص بلا أجنحة ..🪽🪽

[نوف الناصر]

‏

للّيل اهيجن ..لفجرِك ..للضّحى ..للمقيل
واجر صوت الشعور المِمْتِلي بالطرب

للورد أغنّي .. لعشبِك .. لارتباك النخيل
لِعْذوقَه اللّي تمايل واتساقط ( رطب )

للغيم أسولف مواعيد المُطر والمسيل
كن السوالف تِسابقْني عليك وْ تصب

لاحساسك اعزف و ادندن للشعور النبيل
اللي نِما بي على غصن الأماني ( عنب )

للشاعر أكتب ..لشِعْري ..للقصيد الجميل
للدفتر اللّي جِمعنا في جنون و شغب

للغصّة أروي تفاصيل الجفا والرحيل
للقصّة اللي كتبتني يوم حبرك نضب

للسهل ..للصعب..للممكن ..وللمستحيل
أكتب تناقض يشتّتني هدوء وصخب

أحلامي اللي تعرّت وارتدت ثوب ليل
اشْعَلْتَها للشّتا البارد بصدرك .. حطب

كنت أعشقك..كان ذكرك بالسوالف يسيل
قلبي يسابق مواعيدي عليك بـ ( عتب )

مدري قليلك كثير .. أو هو كثيرك قليل
إن مـ ارتويتك بموت من الظما والتعب

فستان حزني طويل .. وليت ماهو طويل
أمشي بدرب المفارق واتعثّر غصب

قبل الموداع بضمّك مثل ضمة ( بخيل )
تبّت يدين ( الغياب ) اللي طعنّي و تب



10 سبتمبر 2023

‏

أبعاد

www.ab33ad.com/vb/showthread.php?t=44353


تويتر

https://x.com/too_simple_girl/status...489589386?s=46