هذي هي أفضل قصايدي واشرفها

[صالح الحمود]

بسم الله
اللهم صلي وسلم على نبينا محمد

______________(سيد أسياد الأمم)_______________

[poem=font=",6,,bold,normal" bkcolor="transparent" bkimage="" border="none,4," type=2 line=1 align=center use=ex num="0,black""]
ما لقيت ابخل منَ الإعـراض عن مـدح الكريم=وما عرفت اكرم منَ الإحجام عن ذمّ اللئام
وانت يا سـيّد عـباد الله يالـفذّ العـظـيم=منت حي الله كريم وْمنت حي الله إمـــام
هـادي الأمّــه وقايد هديهـا الهدي الـقويم=سيّد اسياد الأمم والأنبيا سـيْـد الأنام
شرّفك ربي وصانك عن حماقات الأثيم=واكْرَمَكْ باعظم رساله واصطفاك مْن الكرام
لك مقامك..واعتبارك..واحترامك يالفخيم=ولك على كل المعالي والعُــلا قدْر وْمـقـام
مـا يوَفـّيـك الـكـلام ..وْلا يترجـمـك الــكـليم=ويش ما قلنا وقلنا ما يوفـّيـك الكـــــلام
ياصفونك بالوفا..والصدق..والحسن التميم=وانت من حسنك تتمم كلّ وصف ٍ ما يُـرام
فاضلٍ .. .طاهر..عفيف النفس.. مبرور ٍ.. رحيم=عابد ٍ.. زاهد..شكورٍ.. صادقٍ .. شهمٍ .. هُمام
عالي الهمّه .. رفيع الشان .. بطـّاشٍ .. كظيم=ليـّـن الجانب .. شديد الباس . .مغوارٍ .. سِمام
قـاهــر ٍ مـا تقهـر الاّ زمــرة ابليس الرجـيـم=وافي ٍ ما تخـلـف الاّ هـقوة اعْيال الحـرام
كـايد ٍ ما أهونك عند الـمـواعظ يالحكيم=هـيّن ٍ مـا أكـودك عند التهـاون بالـحـــــرام
ثابت ٍ ما يرهبك سهم المنايا والخصيم=مـرهـب ٍ ما ثبـّتـك غير التصـدّي للسهام
تـنـدفع نحْو الأعادي مثْل طعنه بالصّميم=ما يريـبـك معتركهم .. أو يخيفك اِلْتِحَام
اخترقت اصفوفهم واغديتهم جمع ٍ قسيم=ما تقول الاّ قطيع اذْياب باغنام ٍ حيام
شُـوفهم والسيف يدفعهم أمامك كالحطيم= كنهم من خلف ظهْرك يدفعونك للأمام
ما أحَد فيهم على كثـْر العدد روّح سليم=اللي ما طاح بْحِبالك طاح بالسيف الحسام
ما صدق من قال لا يمكن يحيض الاّ الحريم=هذا سيفك يجري منْه الدَّّمِّ وايخلّف عظام
ومـثـْلِ ما تذبح صناديد العرب وقت الصـديم=تذبح اعدائك بلا طعن .. وتناحر .. واصطدام
منهم اللي تذبحه بالمجد .. والملك التخيم=ومنهم اللي تذبحه بالطيب .. واحسان الوئام
اجتمع فيك..الكرم..والحلم..والبطش الوخيم=اجتماع الدّر.. بالياقوت.. والماس الـمُرام
بكْ صلابة ( موسى ) واصرار الأبي (نوح) الحليم=وبكْ فراسة سيّدي ( يعقوب ) واذْعَان الشيام
وبكْ طهر (مريم) وعفـّة (ابنها) البرّ الحميم=وبكْ دماثةْ سيْـدنا ( يحيى ) تغشـّـاه السلام
وفيك من (يوسف ابن يعقوب) حسنه يالوسيم=وفيك من (داؤود) حِسْن الصوم واحسان القيام
وفيك إخلاص الكفاة العابدين اهل الرقيم=وانك ابلغ من بلغ في منطقه سقف الكلام
فيك مالا عين شافت واسمعت إذن السليم= كامل ٍ ما ينقصك غير التباهي بالتمام
والذي سوّاك واحسن صورتك إنك عديم=وانّ تشبيهك بِمَنْ دونك من العالم حـرام
لكن انـتـه ما أحَـد فــوقـك سـوى رب الحطيم =يـعنـي مجـبـور اوْصِـفِك بالأدنى من عـلْـو المـقـام
مثْل مـا ربي وصـف نـوره بِمشـكاة الـعـتيم=أو كمـا شـبّه ضـيـاء الشـمس بسْـراج الظلام
سيدي : تالله ما مثلك .. ولا فوقك .. قويم=كمّلِك ربي وزادك بالسماحه والقوام
تغـتـنم كلْ ما غـنمته من غنايم يالغـنيم=بالعطا.. والطيب.. والبذل .. المضاهي للغمام
ما تخاف الفقْر.. أو تخشى مِنَ الجوع الأليم=كنك اللي يـرتجي بالجوع تحصيل الطعام
ان عطيت اوفيت.. ما تِمْسِك.. ولا تذخر نعيم=وان مسكت .. اوفيت بالإمساك أيام الصيام
تـتّـقـي بخْل العطايا اتّـقائك للجحيم=وتجتـنب شح المكارم اجتـنابك للحرام
لو يعَـرْف البحْر كفّك ما ترقرق للنسيم=ولو يعَرْف الفضْل فضلك ما تفضّل به أنام
بكْ نباهي منجزات الغرب والشرق القديم=وبكْ نفاخر.. الأواخر.. والأواسط ..والقُدام
لا فخر فانت المعظّم بالبشر وانت الزعيم= الزعيم اللي تحَتْ ماطاه ينحطّ العِظَام
ما يضرّك نابح ٍ ينبح مِنِ اكلاب الرجيم=دام قدرك فوق تـقــدير البشر عند السلام
وكان مدهشهم وجودك باللَّـحَـد وانت العظيم=فالدُّرر وسْط الصدف تحْـت الطحالب والركام
كرّم الله في ختامك أنبيائه يالكريم=واكرم الله أُمّتك حين اصطفاهم للختام
يكفي ان المدح في شخصك نقيصه يالتميم=ويكفي ان العجز عن مدحك مديحه والسلام[/poem]

الاهداء
للخالد/خالد صالح الحربي