ثأر ليلي...

[نوف مطير]

الليل تارك في ضلوعي سكاكين
وانا ضحية فكري اللي ذبحني

حتى عيوني فيّضت عبرة البين
ومن هلت الدمعه لهبها لفحني

قلت اكتب احساسي واقلّب موازين
واتظاهر البسمة لمن هو لمحني

لكن نشف حبري وصمتي لـ هالحين
الجرح جرحي وان كتبته فضحني

لو بات في صدري وبين الدواوين
يصحى ليا جرّيت بالحزن لحني

كنّ الشعر له في سمايه جناحين
لا حلّق الهاجس قصيدي شرحني

والهم والذكرى ضيوفٍ عزيزين
وجيّاتهم تشبه حبيبٍ جرحني

وادري بينبت في طريقي بساتين
ولو ثار ليلي بالمواجه طرحني