ظلال وحفيف

[عبدالعزيز المخلّفي]

..

.

ماتعوشبت لا لا صرت كلك خريف
وانت روحك مطر وشلون جاك الجفاف

منطفي والإجابة حزن صاخب مخيف
يرتسم في عيونك كل حيرة مطاف

تجمع حطام ذكرى وامنيات ورفيف
من حديث المواسم للسنين العجاف

منت الاول اعرفك لا تحاول تضيف
هالة الفرح تستر ماتضم النحاف

كنت الاكثر وبل يوم المفازات صيف
كنت الأصدق مشاعر كنت الادنى قطاف

في غياب الاحبة كان حزنك شفيف
في حضور الاحبة كان قلبك يخاف

من ليال الوداع ومن تعابير طيف
مكفهر الملامح مر غالي وطاف

أرجع ارجع وسولف حزن الايام ضيف
يستطيب المقام إليا لقاله ضفاف

وموغل الصمت وارف له ظلال وحفيف
كم تداعى حزينٍ في وصاله وعاف

لذة البوح للقلب القريب النظيف
وأنطفى في عيونه كل صدق اعتراف

صـاااااحبي
لا تحاول لا توقف نزيف
أترك الحزن ينسل من جروح الشغاف

سولفه لين تلقى فـ المحاديب ريف
خل ركبك يمرون المواجع خفاف


..
.