" ماتشيب الاماني لو تخيب الظنون " بداح الشويب

[بداح المطيري]

ماتشيب الاماني !! لو تخيب الظنون
وما تضيق الحياه وعند ربي سعه ..

وماتميل الجذوع و لو تميل الغصون
مايترفّع يا بعض الناس لو ترفعه !!

نعْرف السابقون ونعْرف اللاحقون
بس من يقطع الارزاق .. ليه إِقطعه !!

من تشمّت وقال ان العرب يكذبون
لو تدور الدواير راح يكذب معه !!

ومن يقول البشر مصيرهم يشبعون
مايشوف الطمع .. وشلون مايشبعه

مايصير الخيال و لو تجيبه لحون
لو يعيش الخيال .. الواقع بيفجعه

ياهدوء الليالي وش ورا هالسكون !!
والزمن لا خذا له شيء ما رجعه !!

القناعه حوار ان كانهم يسمعون !!
و الليالي كفيله .. و الزمن يقنعه

اختلاف الفكر لايعني انه جنون !!
واتفاق العقل : لا يعني المنفعه ؟؟

واحتباس الحراره صدر كل امغبون
بـ اندفاعه ( تفجّر ) لو تبي تدفعه ..

وانتظار الوصل مابين يمكن يجون !!
ممكن انه يروح ( وممكن بيزرعه ) ـ ..

#بداح_الشويب