ولا بالبيد حيله

[عبدالله البطي]

جرى الوادي دموعي سال سيلة
بعد فرقا ولا باليد حيله
انادي يافلانه وش جرالك
بعد هذا العمر حبك ازيله
انا معك اربع سنينن قضن لي
وهذا العام حددلي حصيله
ماهو معقول انسى الحب واسلى
وانا مدمن غلاكم واهتويله
انا كم صبح من صوتك تقهوى
سماعي وكم ضحاه وكم ليلة
رسمت الحلم من شانك بعزمي
ابيع احباب واصحاب وقبيلة
دموعي والرسايل والهدايا
وعنادك والدروب المستحيله
ترى حكم الفراق الي تقوله
نهاية قلب في صدري اشيله
بعد ماغابت اعيونك حبيبي
حبيبك مالقى قلبن يعيله
انا لو يرفض الواقع وصالك
اطوع واقعي لو ما يجيله
واذا حظي خذلني ما خذلتك
انا اسعى لو منعني من قليله
انا ما امل عثراتك واحبك
حشا لو غيبتك عني طويله
انا لو حال مابيني وبينك
ادور للوصل ايت وسيله
واسامح كل زله من سموك
انا جزء الخطأ لو ما انتميله
وبكى من بعد ماطروا وداعك
ياديمه للضما عيني تخيله
انا من دون وصلك وش بقالي
سوى ذكرى وعهدن ارتكيله
بعد ماتسمع احروفي تاكد
لهيب البعد سعر فالفتيله
وسوالك من احساسي قصيده
عفيفة حس والفكرة جليلة
فلا تخذل بقلبي يوم ظنه
وهو من لوعتك وا عزتيله
ينادي لك وصوته ماتوقف
حشا حبك فلا ادور بديله