ياريم جيتيني من الخوف تبكين
ماتعرفي إن الخوف لـ عظامي أوطان
تشكين لامك بس أنا اشكي على مين؟
طفله وأنا مثلك تعالي بالأحضان
خوفك يهون ويمكن إنك تغلّين
ليت السما ياطفلتي تمطر أمان
أو ليت يصحى الحظ ويمدّ لي ايدين
ويحضن رهينة خوف في سجن الأحزان
تنبت سنابل حزني أهداب للعين
وتثمر دموعٍ زاد لأيامي أزمان
وأزهار حلمي ذابله بين كفين
ومن الضما عود الصبر حيل رويان
وجنوني اللي جاع من سبّة البيّن
قبّل جبين الشمس بشعور ثملان
ماتروي عروق العنا أمطار تشرين
والياس يقلب فرحتي مثل نيسان
طوّل مخاض الجرح وأعياني سنين
أهزّ جذع الحظ ويطيح حرمان
والخوف ياعمري مثل ما تشوفين
يدّثرك صدرٍ به الخوف عريان
واقول ياصمت الليالي على وين
تبحر سفينة غربتي دون ربّان
واحضن وسادة وحدتي وارتجف لين
يهتز عرش الليل ويطيح ذبلان
وأقول ياعين اسهري لا تنامين
يمكن ينام الحزن في قلب حيران
وياطفلتي غضّي البصر لا تشوفين
ترى الدموع اللي نزلت جمر بردان
واخذي نصيحة للزمن لا تعدين
أيام حزنك واحتويها بنسيان
وإن هبّت رياح العنا لاتخافين
دامك بحضني والحضن موطن أمان.!
مجلة المختلف لشهراكتوبر 2010
آخر المشاركات
10-12-2010, 03:13 AM
العرض الشجري