شكوى لغير الله صارت عار ومذلة

[محمود النبهاني]

إن جيت صوبك ياوليفي شاكيـ ن علة
وهدوب عيني من دموع الذل غرقانة

خذ من علومي ماتبي والهم لي خله
عندي الفرح عندي الحزن والنفس هيمانه

خلنا نزيل الهم نسهر ليل مـ نمله
نسقي قلوبـ ن بالرجى والود عطشانه

هات الربابة والربع ونشلها شلة
واعزف لنا من نغمة الآهات والدانة

لعلع بصوتـ ن يرقح الفنجان والدلة
خل النجوم بضوها بالليل سهرانة

خذني لدربـ ن بالوصل ماعدت أندله
إنته دليلي في كلام الليل واحزانه

رجع ليالي شفت فيها غزيل الفلة
فتان يمشي والقوام يزيد مزيانه

كم قلتله من خاطري يازين هالطلة
من يغمز بعينه يثير القلب أشجانه

يرمي بسهمـ ن ماتجيبه رمية الجلة
في الثقل لما صوبت قلبي وشريانه

صح الزمان اللي مضى مايرجع لحله
بس ذكرياته تستمر لو طال نسيانه

مـ يهمني شيب مدام القلب تحتله
في نهر دمه ساكنة بالشوق غرقانة

مايضمن الاسطول يعبر في البحر كله
حتى تجيه العاصفة ويتوه قبطانه

كم من خليلـ ن غاب شوفه عن لقا خله
ماقد بقاله غير رب العرش سبحانه

شكوى لغير الله صارت عار ومذلة
ما أشتكي لو زاد قلبي حرق نيرانه

يارب غفرانك دعيتك تغفر الزلة
عن عبدك اللي صار مذنب والهوى خانه