ودي أنسى

[منتهى القريش]

ودي أنسى كل شي
حتى إسمي
ودي أصبح مثل ريشه
اطير فوووووووووووووق
وتبقى روحي هايمه

ودي أركض.. ارتفع
اوصل حدود السما
ودي أتعرى
حتى من وجودي
اموت ... ارجع
اتنفس العالم نقا
وارتوي بعد الظما

ودي أعرف
ليه تذبحنا المواجع
وليه كذبه
كذبه وحده
ممكن تأثر وتقتل
من هنا لهناك توصل
تحمل اكفان وفجايع

وين صحوة هالضماير
تكون ماتت؟
تكون غابت؟
وبعدها صرنا حيارى
أو سكارى
وصار حظنا
مره عاثر
ومره بين الزيف ضايع

ودي أبكي
بس ويش نفع الدموع
ودي أعصر كل أنيني
ودي مره أحس إني
بلا قيود
امشي.. أتحرك.. أقاوم
وفوق ظهري
أحمل ابواب سجني

واعبر حدود الأماكن
واصرخ بصمتي واغني
واطلق الآهات زفره
بعد زفره
بعد زفره
يمكن ابرى
وآتبرى حتى مني

آآآآخ من دمعي خذلني
البارحه جداً نخيته
توسلت روحي تبيه
يغسل اجراحي شويه
وا عليه
صمته بالمقله ذبحني

البارحه
كنت افكر
يوم همومي هيضني
صرت اسولف ويا روحي
يا ترى وين الحقيقه
وحسيت اني
صرت اغرق في بحور الهم أكثر
صار همي فيني يكبر
وصرت ادور طيف فرحه
بين آلامي وحزني
حسيت اني
حتى وجهي ..
لما شفته في المرايه ما عرفني

تصدق اني
لما حسيت بضياعي
صرت ادور عن عيونك
صرت ادورني لأني
من سكنتك
خاب في كل الناس ظني

كان ودي امتحني
واعترف لك ب اللي فيني
كان ودي
افتح الصفحه بياض
واكتبك فيها (حبيبي)
وقبلها اكتب حلم
وبعدها أكتب ألم
بس صمتي..
حتى صمتي ..
في اعترافي لك خذلني

قلت اهرب من عيونك
وانسى اني
(منتهى) كل المواجع
واهوجس بإسمي لأني
م البدايه انتهيت
كنت ادورني ولقيت
حظي العاثر
في حروف اسمي امتحني

وآه يا حزن الذبحني
ودي أنسى كل شي
حتى اسمي
ودي اهرب من وجودي
وامسح حدود الأماكن
وابتدي بي م النهايه
وانسى إني
كنت اموت
وكنت اموت
وكنت اموت
يمكن ابرى من جراحي
يمكن ابصر حي صاحي
يمكن اعرف منهو آنا
وانسى كم ميت جرحني...

 

[نواف التركي]

المشاركة الأصلية كتبت بواسطة منتهى القريش

حتى وجهي ..
لما شفته في المرايه ما عرفني
.

هذا الشعور قاتل


منتهى الروعه

رغم حجم الألم

صح قلبك

ودمتي بخير

 

[عبدالعزيز رشيد]

اختي
منتهى
.
.
وحيرة تتوسّد الحروف
لتغفو عليها فتنشأ أحلام الاجابات
ومع هذا الحلم \ النصّ
لابدّ من إجابه موجوده
تتبعها صحوتك

ألف ألف تحيّة لك

 

[خالد صالح الحربي]

:

مُنتَهى قريش:
واصلي التحليق فهذا الفضاء رَحْب..
وأنتِ تملكين أجنحةً مُهيأةً للسُّمُو ..
هذه المشاركة الثانية التي أتوقّف لها..
وَ تُحفّزني لـِ..إنتظار الثالثة..
شُكري وتقديري .

 

[منتهى القريش]

أخي نواف التركي

هكذا هي أرواحنا عندما تحس الغربه ... تنزف الألم

صح كلك ... ولقلبك الفرح

 

[سلطان ربيع]

منتهى القريش

هطولكِ مغاير
وما تقدم أعلاه
يكاد أن يقطر .

 

[عبدالله السويدان]

منتهى......الكاتبة

هنا الشعر ابتدا



حضورك سيدتي اشبه بنسائم صباح ربيعي وان سكنها بعض الالم

يهمني الصور

وتدهشني الفكرة

واطرب للقصائد التي تنساب الي الافئدة دون استئذان وبلا(احم ولا دستور)

نص غارق بالجمال

اشكر لك كل هذا التميز سيدتي

 

[قايـد الحربي]

منتهى القريش
ــــــــــــ
* * *

شفافية الماء : حرفك
والمُنسكبُ من الأعلى ليس إلاّ : المطر .

فائضةٌ بالشعر ــــــــــــــــــــ إلينا ،
فشكراً .