على حدبا الجناح أم الهلال ونخله وسيفين

[مرعي ونيس]

لمحمد نزال مع التحيه

على حدبا الجناح أم الهلال ونخله وسيفيـن
....صديقة السمـا بنـت الخطـوط السعوديـه

مُنى..اللي لويبي ياصل قبل وقت الفجر برلين
....وصلّ معزز..مكـرم علـى أحلى خطـوط جويـه

تلاعبها الهبايب للحبايـب ترسـم الخطيـن
....على وجه السما.. نفاثها قـلّ لارحـم بيّـه

كباتنها..شقرديـه وشبيّحـه وعلـى الديـن
....وكل واحد يقول لصاحبه: خـلّ التعـب ليّـه

ومضيفتها..وضيفتها ليامن سلهمت بالعيـن
...فريس وفوق ضلع وبيتوا على الغـزو.. نيـه

وحواجبها ..وواجبها..تشرح حنيّة القوسيـن
....هلالين..وهلا..لين.. الشعر ماينكتـب زيّـه

عليّها أكد الحجز الريـاض لديـرة الغاليـن
....هل الخيل /وهل الهيل/ وهل البن/ وهل الهيّه

لطريف ..وريف من زاره من هنيّاليوم الدين
.....على سلم الجدود ورايـة العـادات محميّـه

لربعي الجبـال الشم..العاتيـن ..والعاليـن
....مزابين الدخيل أيام..رمح ...وطعـن شبريـّه

مداهيـل الرجـال الغانميـن وقـرةٍ للعيـن
....قلوب أبيض من وجيه السحاب بصفوة النيّـه

وتاصل لأبوفارس وأنشدالدانيين والقاصيـن
.....يعرفونه لأنه أشهر من علم.. ونار العلم حيّه

وخذّ..هذا سلامي..بس هذا (غيـر) للغاليـن
.....سلامٍ مـن ورى بواتـراً بالصـدر محنيّـه

محمد..والقصيد أقصر من أنه يكتب الوافيـن
.....محمد..يبطن بطون النسـا ماينجبـن زيّـه

محمد..دارت الدنيا..ولازال أقرب من العيـن
....محمد..مايوفيّـه الشعـر لـوقـال ألفـيّـه

محمد..كان للدنيـا تعيّـد بالسنـه عيديـن
....هو الثالث..وليامنـه ضحـك أعـز عيديـه

وصلاة الله على سيد البشر رسولنا الأميـن
....عـدد ماهـل ماطرها..بالحـدود الشماليـه