قُرصين وايدام..'

[عبدالمجيد احمد]

أمّا قبل:
السلام عليكم ورحمة الله وبركاته

أمّا بعد:



لا صفحةً جفّت.. ولا رفعت اقلام
نفس البداية كل يوم انتهيها..!

وضعي كذا لاهو حقيقه ولا اوهام
لاهي (بعين الناس) وانا اتليها..!!

ومْن التناقض بيني وبين الايام
شكواي طول الدهر منها واليها..!

احيان، اقول انْ ما كما احلامي احلام
واحياناً (العن والدَيْ والديها)..!

والجادل اللي مهرها عشرة اعوام..!
حليلتي..غير اذهبوني ذويها..!!

صكّوا عليها قفل ابو خمسة ارقام
لين احرموا يدي تلامس يديها..'

ذي حالتي باسبابها (جلد وعظام)
وانا اتفاخر باسمها واتبيها..!

في عيني من الحزن تاجين و وسام
ومن السهر والضيم فيها.. وفيها..!

امسي وانا بين الفهم والتفيهام
والنفس تعرف وش لها وش عليها

اشب..لعيون القلق في ورق شام
واصب..كاس الراح لين انتشيها..'

واصبح وبيدي عود يا راك ي بْشام
وانشد: (مفاتيح الفرج من لقيها؟)

لاني بجبريل الفضايل للانام..
ولاني رسول المنكرات ونبيها..'

والدحْلسه والولوله والتحلطام
مالله خلقها لي ولاني ب ابيها..!

ياخاطري لا عاد تشقى وتنضام
ترى صروف الدهر ماحدً شويها

اقدارنا ماهي ب قُرصين وايدام
حتى اتخيّر بينها وانتقيها..!

والحاجة اللي دونها حب الاقدام
حرّج عليها قبل ما تشتريها..'

مادام عين الشمس حية ومادام
عينك، طواريق السهر تهتويها

الزّم بحلق الصبر والوعد قدام
والله يعين الروح فاللي يجيها..!

#عبدالمجيد_احمد

.
.
.