عشانك بسّ تقريني ،

[حسام المجلاد]

خوذيني لوين ماودّك وودّيني
مادامك بعيني المشوار واليمّه !!

إلّا بْـ طريق المفارق .. لاتغصبيني
هذا الطريق بْحياتي مقدر آتمّه !!

الله يهدّ الزمن كم قصّر .. إيديني
يخمّني، لانواني واعجز .. آخمّه !!

اشتقت لِك وإشتياقي حيل مشقيني
ياخذني بشعري "المغمُور" للقمّه !!

من كثْر ماكان "حبّك" ساكنٍ فيني :
طِيفك ليا مرنيّ آحاول .. آضمّه !!

ومن كثْر ماشفت "حنيّتك"، تحْويني؟
احياناً لْيا بغيتك قلت لِك "يمّه" !!

واليوم فرّق زمانٍ "بينك ، وبيني"
والوقْت فاقد ضمير وفاقدٍ ذمّه !!

وقّف بوجهي وانَا والله ، مافيني
لمناطح الوقت؛ لاعزمٍ ولاهمّه !!

- الحزن من يوم غبتي . مايخليني
نشّف دموعي، وقلبي ناشفٍ دمّه !!

والناس من كثْر ماحزني مخاويني :
بدَت تسائل ؛ "يجوز إنّه ولَد عمه" !! -

والشعر هذا ؟ عشانك بسّ.. تقريني
شاعرك ناس التّويتر، ماهي تهمّه !!