شعورعابر ينثر احساسي ويروح !!

أحمد المعمري · 12-01-2011, 03:59 PM

مساكم شوق

اشتقت لحضوركم وطلتكم اخواني

ما حبيت اغيب اكثر

قلت اشاركم بمقتطفات شعرية سريعه

يااااااه ي مطول غيابك ويش جابك
الا اهلا يا حبيبي ويا هلابك

هذي الغيبة طويلة ما علينا
اقرب ورتب لدمعاتي زهابك

كل غايب لا رجع يتبعه عذره
وانت عذرك ينجلي بحضرة غيابك

لا اختلينا قالوا الشيطان حاضر
وش يقولوا لحسنك اعوام اختلابك!!

ياااه ي اجمل ما خلق ربي تمهل
امتناني لو تجدد لي انتسابك

ليت لي قدرة واعيشك كل عمري
ولو بغيت اكون قطعة من ثيابك

عالاقل لو م البسك وواضم متنك!
ابقى لك عايش ولمقابل جنابك

//////////////////////////////////////////////////////

أسرق أسرق ما بقى فيني حلالك
أو أقلك انتظر لا ـ تسرقه

هاك عمري ﮘڵ ما فيني فدالك
بس فدالك دون أية تفرقة

العمر مكتوب من جيته ( أنااا لك )
والحسن من مغربه لي مشرقه

يا ضياع التيه بصدور المسالك
باب ما ردك تعنى واطرقة

ازدواجك يلبسه حضرة دلالك
ؤانت وحدك ب ازدواجك افرقة

ينحني لك ليل من هيبة جمالك
والعسل لا من شربته تشرقه

ينبت السكر على شفة جلالك
امتناني لو تجيني وأسرقه

وش تفيد الشمس لا أقبل زوالك
ووش يفيد الدمع أذرف أزرقه

اشتهي السيجار لا عييا وصالك
صدر ما إنته فيه ودي احرقه

/////////////////////////////////////////////////////

تمشي ويمشي الحزن من وين ما راحت
الليل هذا حزنها وين ما تسري

هي ذنبها للعشق صانت ولا باحت
وانا عشان العشق سلمتها صدري

واليوم ماتت ( أماني ) والفرح زاحت
ووصيت ذا الحزن ياخذني على عبري

ما عاد للعين دمعة ما بعد طاحت
ولا عاد للود ذكرى تحتضن ذكري

ضيعتها غصّب وبروق اليأس لاحت
والجرح اقسم بربي ما بعد يبري

ايقنت موتي دنا من يوم ما راحت
والذنب ذنبي بعد ما اهديتها عمري!

//////////////////////////////////////////////

دمتم جميعااا

عفراء السويدي · 12-04-2011, 12:11 PM

لاأدري هل هو مروري من هنا .. أم إنتثار أحاسيسك .. أو ربما هو توقيعك .. أخذني إلى هناك ..

وجدتُ الكثير في تردد الأنفاس .. أعمق وأكثر وأكبر من مقتطفاتك هنا ..!
بين شحوب الأنفاس .. وأنفاس القصيدة .. تجلّى حزن القوافي ..
ربما ظلمتُ إختياراتك هنا ..
أو ربما القصيدة هي من نادتني .. لأشهد إكتمالك ..
لاعليك ..
أحياناً .. أتفلسف ..
طاقة واعدة بالأجمل .. سأحرص على متابعتك ..

مرحباً بكَ وأكثر ..

مساء الجرح ..