[ عيدة و حمدة ]

[ناصر حطاب الدهمشي]

السلام عليكم و رحمة الله و بركاته ..
بعيدًا عن الشعر , سأختلي بنفسي هُنا .. : )

[عيدة و حمدة]

بنات في عمر الصميل << ما يركب عليهن عمر الزهور ..
قزّرن حياتهن و ما زالن يقزِّرنّها في قرية صغيرة ..
عيدة .. فتاة ممشوقة القوام طولها حليل و شعرها طويل سمراء البشرة ذكيَّة جدًا..و عندها رادو 24 ساعة حاطته عند إذنها , تموت بتقصيع الجرابيع بالنهار , مستواها التعليمي ثاني متوسط ..
حمدة .. أقصر بقليل من عيدة مليانة شوي و بوجهها إردوع(نقوش) خضرا << مكياج البدو سابقًا
قلبها طيِّب و تصدق أي شي , درست لـ رابع ابتدائي و قالت للمدرسة إخخخخخ إدعععع إدععععع<< لغة لإبعاد الغنم و المعز ..
في أحد الأيام قرر أبو عيدة إنه يودِّي أهله يم الديرة عشان يتغرضون أغراض العيد
تخبرون القرية ما فيها محلات لبيع حاجيَّات الحريِّم , ما بها إلا إدكيكين لـ إعجيِّز اسمها أم شافي تاجرة قماش تبيع الطاقة دبل دبل السعر اللي بمحلات سوق الديرة و حتى بضاعتها مثل خشتها دقَّة قديمة و لا تعرف من الألوان إلا اللون الأزرق .. ليه ؟ ما أحد يدري !
يعني حريم القرية كل ملابسهن زرق و السبب بضاعة أم شافي اللي لاقيتهم و تضحك عليهم خخخ
المهم .. عيدة يوم درت عن سالفة السفر للديرة راحت يم خويتها حمدة و علمتها بالسالفة ..وطلبت منها تخاويهم
حمدة أبوها رجال كبير و لا عنده سيارة يعني إذا ما راحت مع اهل عيده راح تفلس من السوق و لا تشوفه إلا بالعيد الثاني ..
اهاااااا روحي يا حمدة و كلمي أمتس .. قالت يمه أبروح مع أهل عيدة يم الديرة عشان اشتري لي ملابس للعيد
أم حمدة : يا بنيتي وشلون تبين تروحين معهم ! أبتس ددسنهم ما تكفيهم و بعدين وغدانهم واجد ..و ولدهم حنيف عويناته زايغة يا علَّها للفضخ!
حمدة : يا ميِّتي أبروح و بعدين حنيف ما هو رايح معهم
أم حمدة : أبتس أنت ِ وش درّاتس هاااه !
حمدة : يا يمه و حلالهم من يقعد عنده ! أنتِ نسيتي إن حنيف هو راعي الحلال !
أم حمدة : لا ما نسيت بس قليل الفود دابلن تسبدي من العام يوم إنه فضخ عين نعجتي الدرعا .. إلا هم متى يبون يروحون ؟
حمدة : أظنهم باتسر الصبح و بيردون بنفس اليوم
هنا .. راحت أم حمدة و فتحت الكبت و طلَّعت لها صرَّة و قعدت إتنخبك بها وهي مديرتن ظهرها عن حمدة
حمدة عويناتها تروح يمين و يسار تبي تشوف أمها وش قاعدة تسوي ..<< فضولية عادي ما فيها شي خخخ
أثاري أم حمدة داستن الفلوس بالصرَّة << يا جودها جوداااااه خايفتن عليهن من النطلاااان
أم حمدة لـ حمدة : توحيني زين ابقولتس كلام و جوديه يا بنيتي
حمدة : فاتحتن حلقها هاااااه يمه وش عندتس قولي تراني اوحيتس ..
أم حمدة : انتبهي يا بنيتي الله الله بالنفنوف الزين و بعدين لا قالتس البياع قميته بكذا .. لاوزيه بالقيمة إملاوز ياما تنشفين تسبده .. خليتس ذيبة و انا امتس تراهم إلْـ هيبية ..ما هم بعيدين عن ام شافي ..
حمدة : ما عليتس يمه و الله للعن جدفه الجدف أنا حمدة بنت أبو حمدة ما ينضحك علي يا ميتي << فاهمة المكاسرة غلط : )
أم حمدة : عفية بنيتي .. هاتس هذي الفلوس احفيظها لا تضيع و الحين روحي يم عيدة و قولي لها مروني لا بغيتم تروحون أبخاويكم : )
حمدة : من أمس وهي عند بيت أهل عيدة طق طق طق << تبي تكلم خويتها عيدة عشان يمرونها باتسر : )
و بالوقت اللي حمدة تنتظر ينفتح فيه الباب , قعدت تراعي مع خرم الباب تبي تشوف هو فيه أحد جاي يفتح الباب و إلا لا ..
يتبع ..