غرام ...

[متعب آل حشيان]

على رحب السعه مدري ورى صدر الوصال يضيق
تمر البال ذكرى مدري الذكرى هي الضيقه

فتحت من النوافذ مايتيح لنوره التوثيق
غرام الامس حتى لو وضوح الامر توثيقه

اطيّر من عصافير الامل مايرسم التشويق
وارتب نشوة الاحساس واضبط طيش تشويقه

اصفف ذكرياتي فوق رف اليوم قبل اريق
بقايا الامس مع دمع الوداع وعيني اتريقه

نعايشها الصدف وتنام فينا والفراق ايفيق
لاصار الوصل ياخذه السبات وصعبه انفيقه

يدولبنا الوهم والوقت عايش صحوة التوهيق
ونستسلم لواقعنا واساليبه وتوهيقه

مجاريح الغرام اللي يصب الجرح صب ابريق
ونشرب كاسته بسكات ونغني لباريقه

سوالف حلمنا الماضي لها ماضي مع التغريق
تلوّح بالكفوف اللي نفت قلبي لتغريقه

تعاظمت الصبر يوم الصبر تدقيق في تدقيق
وباغتني عظيم الياس قبل امعن بتدقيقه

متعب الحشيان
ساري الرياض