نسرين

[علي الحسني]

صباحك النسرين والنرجس وموكا فك ريق
واحلى ابتسامه ترسم البهجه يرتبها سناك




وانا على شاطي البحر لكني افـ بحرك غريق
بحر هواك اعمق من اعمق بحر كنزه محتواك




يادهشتي من نظرتي حسنك سحرني بالبريق
وقفت اشاهد والتزمت الصمت في حضرة بهاك




ماكني المستبصر اللي يسبر اعماق العميق
رسّيني بساحل عيونك مقدر اوصل منتهاك




جيتك وقلبي قد سبقني لك ولا ضل الطريق
وانا على نبضه مشيت بشوق واترقب لقاك




جيتك خذيني منك لك خليني اسكر لين افيق
من خمرك الفاخر وشاهد مصدره رونق شفاك




خليني انساني واعيشك جو رومنسي رقيق
واحلى مسى شانيل نمبر فايف يعطر مساك




لاوالله الا اخطيت منّك فيك عطرك والرحيق
حاولت اقارن خانني التعبير واحرجني شذاك