مواساة لـ " حلم البواخر " ..

[نايف الرحيمي]

مساءٌ .. يَـغرق ..
باللون / بالدمع ..

الأزرق

:

:

:

أيام مرّت .. وانتهت بعدَها سْنين
رسمت فيها من خيالي .. أماني

اشعلت شمعة حلم .. ثمْ قلت بعدين
اكيد راحة ... واِبتسم .. يا زماني

كنت انتظر فرحة زماني .. وهالحين
صارت على صدري تضيق المحاني

والدمعة .. اللي تلمع بداخل العين
اختارت مْن اطراف خدي .. مواني

الحظ معها طاح .. ياحظه الشين
حاولت أكفّ اللي بقى .. مامداني

ثقل الحزن يرجح بكل الموازين
يوم الفرح لامن دعيته.. عصاني

لو الحياه تفيد معها .. "التلاوين"
لوّنت "شِهب" ايامها.. أرجواني

مليت أدوّر بالصحاري .. بساتين
مليت أدوّر بالمداين .. مباني

تعبت اقاسي .. صدمتي فالمحبين
تعبت اواسي .. دمعتي بالأغاني

شكيت بعض من العنا .. للعناوين
بكيت بعض من العنا .. للمعاني

لقيت هذا الحزن لو راح يومين
بكره يجينا بس .. في شكل ثاني

:

.