واحة الحزن

[عبدالله العتيبي]

الحزن واحة خافقي فـي سماهـا
طيرٍ يحوم ولا لقى حولهـا فـي

واحة جفاف// العمر حزن ارتواها
وكسّر غصونه والثمر صار مذوي

مابه ملامح // للحياة وصفاها
إلا غرابٍ ينعق اصوات تدوي

وريحٍ تصرصر بعضها من عتاها
غي المدامع غي // والعاتية غي

اطوى ظمى الايام واطلق رشاها
وترجع وفاضٍ مابها قطرة المي

واليأس ماخلا .. شبر ماوطاها
حتى براعمها طواه العطش طي

كل ما أغمّض في عيوني اراها
احلى طيوفٍ كنت من اجلها حي

اسنين مرّت // واحتسينا حلاها
والمر هذا اللي بقى .. والشقاء لي

راحت وخلتني // اسير لهواها
عهدي بها يوم الفجر (كان له ضي)

ويوم القمر له بسمةٍ وش حلاها
ويوم الليالي .. مالها شكلٍ وزي

اصارع احلامٍ مضت لي معاها
واجاذب الحسرات وانوح وابكي

اكبر ذنوبي في عذابي .. غلاها
واصغر ذنوبي في عذابي بعد هي

من قسوة الدنيا // وجاير قضاها
مكتوب لي حمل العناء لو اقول أي

هذي هي الدنيا اذا اعطت قفاهـا
تخليك في خانة فضاء // مابها شي