روآسي:
أولا :شكرا أنك افتقدت حضور قصائدي في أبعاد
ثانيا: شكرا للسبب المذكور أعلاه.
عاشرا: شكرا لنفس السبب.
وبعد .. إهداء لمشاعرك الرقيقه،
لو أنسى دفا عيونك
بعيش طول العمر بردان!
لو أنسى صباح ايدينك السمرا
بموت مظلم
ولو أنسى .. أحلم فيك
كل ليله..
يظل فيني الندم.. سهرا
ويشجّر سواد الليل .. في روحي
وتنبت للدموع أغصان
ولو أنسى هذاك الغامض بصوتك
اللي ينثر بْحضني
_ دايم لا تحكّيتي _
مرايا للعمر والوان
لو أنسى هذاك الغامض بصوتك..
بتحزن كل عصافير الفرح فيني
وتبكي في سماي الحان
ولو انسى ربيع بضحكتك أخضر
بحس دوم المطر.. زعلان
هذاك يوم
وهذا يوم.. من رحتي
ترميني السواحل ..موج
على مينا.. بلا عنوان
من رحتي..
لاشمس دْخلت بيتي
ولا فرحه
ومن رحتي القمر مابان
ومن رحتي
كل يوم احتري عطرك..
يزور ..وأرسم اللحظه..
درايش
وافتح البيبان
وكل برد.. أحتري صوتك
وكل ليل.. أحتري وجهك
وكل مارفّت عيوني..
أقول بتجين
وبتشوفين.. بعيونك
قلبي وشْكثر ولهان،
هذاك يوم
وهذا يوم من رحتي
لاجيتي
ولاغافلني بك ..نسيان!