يا فاخر الأوصاف يا عالي السوم
يالي وجودك في حياتي ضروري
أنت السماء والليل .. منثورة نجوم
وأنت المعاني الساطعه في شعوري
حلمي لقيته بين أياديك مرسوم
ودي سرورك يجتمع مع سروري
من يوم أشوفك يبتسم باقي اليوم
و يشع في عين المخاليق نوري
وإن غاب شوفك تبتدي رحلة الصوم
وأفز من شدة عنادك و جوري
فيك الغرام بوافر المسك مختوم
ولغير روحك ما تِفَتَح زهوري
خليت إسمك في مدى الروح موشوم
خليتني أقطع تجاهك نذوري
أحلم ب طيفك كل ما جيت للنوم
وأتخيل أنفاسك لو إنها بخوري
وأقول في نفسي ألا ليتك تدوم
ويصير حبري يكتبك في سطوري
أول قبل لا ألقاك ما كنت مفهوم
ماعرف حقيقة واقعي من غروري
بينت لي وش كثر انا كنت محروم
وأجبرتني أثبت فخامه حضوري
مادام موجي ما يبي غيرك يعوم
إبحر و روح لا تردك بحوري
خلك معي دايم وأنا أوعدك بأدوم
يالي وجودك في حياتي ضروري