[حنان العصيمي]

اجي لك مندفع وارجي عسى قلبك علي يروف
...................... واروح ولا ظفرت الا بهم ٍ منك قافيني

تعبت اطرد سرابك والمشاعر من عطشها وقوف
...................... يصافقها الحيام اللي مثل ثوبي مضفيني

على شانك تحملت المتاعب والاسى والخوف
...................... وعلى شانك جفيت اللي من اصحابي مجافيني

دخيلك لا تخلي هامتي تنزل على المكشوف
...................... وانا لي سمعة ٍ لو جيتها مكسور تنفيني

عليك الله وامانه يا ضياعي سوبي معروف
...................... ترى ما عاد لي قلب ٍ ليا احتجته يوفيني

ابيك تحس في قلب ٍ على شوفك يجيه شغوف
...................... يسريه الهيام لشوفتك والناس غافيني

ترى مال الجفا داعي مدام ان الوصل معسوف
...................... تجمل في وانقذني من اللي صاير ٍ فيني

انا محتاج لك حاجة قليل المال للالوف
...................... تعال ابغاك لا نام ٍ ردون الليل تدفيني

إذا انك لاقي ٍ غيري حبايب فـ ابتعد مخلوف
...................... عسى الله معهم يهنيك .. وجروحي تكفيني

( لقائلها )