عذري خطأ .. دام المحبـه خطايـه !
يامن قسيتي قسوة الخوف والجوع
الحـب مـن رب المخالييـق .. ايـه
الحب نور من سمـاء الله منـزوع
الحب عندي نزف .. ما هـو هوايـه !
الحب فوق الكم .. والكيف .. والنـوع
الحـب .. يا حبـي وليـد الهدايـه
الحب وعد بهجة الفجـر مـزروع
وقلبي طفل .. غاوي .. عديم الدرايـه
يطرد عصافير البراءه .. بـلا طـوع !
خـذاه حبـك وانتهـى .. بـ البـدايـه
وأنا اغتربت ولا بقا .. ود وربـوع
تكفين من شحن العواطـف كفايـه
الثرثره في نظـرة عيونـك تلـوع
كفى عتب عاقل .. على قلـب تايـه
عنه العتب ياربة الحسن .. مرفوع
ودي أبوح .. بـ لوعتي .. وبشقايـه
الصمت بـ أيامي سفر .. غير مشـروع !
وان صرت بـ أفواه العـواذل .. حكايـه
فالزين خافي صوت والشين مسموع !
الله كتـب للـحـب .. ذل الوصـايـه !
في مجتمع عن حلو الأحلام ممنوع
لو نشتكي .. ما للمشاعـر حمايـه
كم ذبلت ورود وكم طفيت شمـوع
ونفس البدايه .. هي حديث النهايـه
بدموع حبيتك وأودعك .. بدمـوع !