من قطرات مطر شتاء 2010
،
،
من اول ما بدا هالبرد وعيوني تبي تحكيه
ويزجرها عرق قلبي بعد ما ذوّب أركانه !!
تلحّفت ب غلاه اسنين واسنيني بعد ترجيه
عسى لو بس يناظرها ولو لحظه بأعيانه !!
تمنّينا تحالفنا حظوظ .. و تلتقي لوجيه
ونتناسى شقا هجر (ن) رسم لونه بقيفانه
سقا الله والعمر حالي قبل يرحل وانا ابكيه
قبل لا كمّل المعنى كسر جذعي واغصانه
وعلّمني على شوقي وانا شوقي وش ابغي فيه
مدام اللي رحل ماله أمل يرجع لخلّانه ؟؟!
على مرّ الليالي صرت أتلذّذ وانا اشكيه
لأوراقي وخصلاتي وجملة ( ماني نعسانه ) !!
سؤال(ن) حيّر اجفوني وأعياني وانا مدريه
ولكن بسأله للبحر .. علّ يْجيب مرجانه !
وش الأسهل على العاشق إذا صار العشق يحويه
يبدّل قلبه ب خالي ؟ أو انه ينسى عنوانه ؟؟!
وش الأسهل على الراحل إذا بعده بعد يجفيه
يغيّر إسمه الحالي ؟ أو انه ينكر أوطانه ؟؟!
جِمَد قلبي وانا تْحرّى على حالي " أنا أبغيه"
ويزجرني عرق قلبي بعد ما جمّد أركانه !!!