كل عام وابعاد وساكنيها بـ خير
*
هذا السهر ماورّد لـ عيني نعاس
احس هذا الليل طاغي / بـ طوله
/
تعبت امشّي مابقالي من الياس
اجر خطواتي / ابيها عجوله
\
الحزن خلاني مع ضلوع يبّاس
الهم باقي / والصواديف حوله
/
الصمت قالوا انه اغلى من الماس
واشوفهم عند الحكي / صفقوله
\
ياليل تبقى للمواقيت عساس
لو ماعطاني هالسهر من حلوله
/
خلت المدينة واتلفت / للاجناس
واقيس هم الشارع اللي مشوله
\
رحت اتنشد عن دفا الوقت /جلاس
لقيت سيف الوقت يقرع / طبوله
/
صمت المدينة /والمباني / والاجراس
واطفال ماعاشوا حياة الطفوله
\
ينام هذا الليل بعيون / حراس
ويصحى بعين المقبلات / الخجوله
/
اصبحت كني شيخ ولّي على ناس
وامسيت كني فاقد(ن) لّي حموله !
\
تخنقني العبرة / وانا اقول لاباس
وارجع بتنهيييده عميقه زعوله
/
الحزن / كنه جد والعرق دساس
والناس / كل الناس هذه عجوله
\
والوقت / يرسم هالزوايا بقرطاس
وانا معي قرطاس وازريت اقوله
/
والشعر / هذا ماعرفته من الناس
جاني مع اول هم واقعد ذلوله !
\
كتبت فيه اللي عطاني من احساس
ياما تنادمنا / واخذنا البطوله
/
والحر / سموه الاجاويد قرناس
والبوم / يبقى بوم لو طبلوله
\
والصبر / قرّب ياصل حدود الافلاس
والشوق/ ياصعبه يجيني ... بسهوله
/
والموت / يسرق مابقالي من انفاس
ويروح معه اللي نواه / وينوله
\
ازمة مشاعر زايفة مالها ساس
وازمة وفا / والله وازمة رجوله
/
مابالحزن _ رحمه _ ولافيه نوماس
يقولها اللي عايش (ن) في فصوله
\
ياصاحبي / ياصاحبي / صاحب الناس
يمكن تشوف اللي من اول اقوله
ــــــــــ
طالب _ المدينة