[مشاعل إبراهيم]

[POEM="font="Simplified Arabic,5,crimson,normal,normal" bkcolor="transparent" bkimage="./images/backgrounds/19.gif" border="solid,4,crimson" type=1 line=1 align=center use=sp num="0,black""]هلا باللي خذا كل المراجل من نسل شجعان=هلا بالطيب الوافي عريب الجــد راع الجود

هلا زفيت لك قلب ٍ من الاشواق جا ولهان=عدد ما قاد لك قلبي بـ أوراق الـقوافي قود

هلا يا حــبي الاروع هلا يا قاتل الحرمان=هلا يا بلسم جروحي..هلا يا حبي الموعود

تفضل ياهوى روحي وخذلك بالوفا فنجان=ومن صافي الغلا بهدي قوافي لولوٍ منضود

كأنك عشت في جسمي قبل تسكن به الاعيان=وباب القلب يا خلي عن اجناس البشر مسدود

تعال وخلّني فـ يديك سبحه عقدها مرجان=ابي يديك تحضني تحس بشوق لامحدود

الا يا فزعة الجاني بشوفك تنجلي الاحزان=وتبرا بك جروحي لين تنبت فـ الخفوق ْورود

غزيت الخافق بجيشك كما غزو العدو لبنان=وسلم خافقي نفسه بلا حرب وبليا صمود

وتختال بحشايا مامعك في داخله انسان=تبي تكشف عن الخافي وتحيي ما انطوى بصدود

تبي تجمع شذا الماضي وسيّل خافقي وديان=تجي تسدل ستار البوح لك رد الصدى مظهود

نخيت (الحا) وحرف (البا).. فتح لك قلبي البيبان=غدت أحوالي ابحبك مع الله سرّها موجود

شفى جرحي ،امل عمري،أحبك والغلا بركان=تفجر في شراييني...وهز بخافقي بحدود

أحبك كثر ما حبري يخط بهالورق قيفان=أحبك كلمة بْقلبي وشبّت كالجمر موقود

أحبك وانتثر شوقي على ارض الهوى ريحان=أحبك..ايه انا احبك.. احبك قلتها بوعود

ولولا الخوف يا حبي من الله خالق الاكوان=لخبي زولك افعيني وتبقى بالحشا معبود[/POEM]