ياعظيمة
ياعظيمه .. المعذره..
لو خذيت من وقتك دقايق
بي فضول ٍ يسألك:
من وين لك هالعزيمه؟؟؟
لو سمحتي طالعيني .. علميني ...
كيف تتبدل مفاهيم الهزيمه؟
وكيف انتي؟
رغم ضعف الحال .. ولهفة حاجتك ..
ماشوف لنتي!!!
آسف أشغلتك .. ولكن
ليه أشوفك تجلسين؟
وتسرقين الوقت غفله!
ما أشوفك تلعبين!
وإلا يعني.. منتي طفله؟
تصدقين؟
يوم كنا صغار كبرك
حفظونا في المناهج:
"الكتاب أفضل جليس"
إي حفظناها ولكن..
ننتظر يوم الخميس !!
وانتي.... انتي/ انشودة نجاح
لازم أطفال المدارس
يعرفوها .. يحفظوها
أو يغنوها بـ طابور الصباح
لاتلوميني أمانه
لو تشوفيني أثرثر..
لأْنك أجمل من لمحته بـ المكان
ولأْنك انتي نادره في هـ الزمان
وأذكر انه ؛ من زمااااان
كان أهلنا يضربون أمثال بـ أمثالك كثير
ومنهو اللي ينفع أهله؟
هذا ما مثله أمير !
ياعظيمه
عارف أزعجتك .. وعارف إن وقتك من ذهب..
وانا فاضي ! شاعر يدوّر سبب ..
طالعيني ... سامحيني واغفري
لاتظنيها لقافه..
صدقيني بـ اشتري..
بـ اشتري من عندك شوية تفاؤل؟
لو تبيعينه لنا ..
قبل مايحبط أمانينا تساؤل:
وش مصير عيالنا ؟؟؟؟
لقائلها ..