.
يوم ضاقت قلت وينك يا الفرج..
قال جيت وشفت حولك ألف صاحب وخفت أسبب لك حرج..
ارتكيت بس وين اللي يشيل الحمل وينه؟..
وين ذاك اللي ذخرته للظما قطرات وينه؟..
وين أبو الفزعات عني ما قدرت ألقاه وينه؟..
من لمحني فوق كف الموج فضّ..
كسّر ألواح الرجاء بيني وبينه..
حزّ نفسي..
غصّ في حلقي..
ورضّ كل ضلع لي معاه..
وغضّ عينه..
يحسب أني متّ همّ ولا درى أني حيّ..
لكن متّ من خنقة إدينه..
يا الفرج صاحبي ما شفت زوله من فقدته يوم شدة..
بس لو جاني على قلعة عيوني
حالف أني ما أرده
والمودة يا الفرج هي المودة..
صاحبي ماني بصده..
صاحبي روحي عرينه..
ولو نصاني والنواصي عشب قبري..
والله أني غصب لأحيا ثم عيله..
ارتكيت وطحت والجلمود ناخ..
آه يا كذب الليالي البيض..
آه يا ظلم السباخ..
من مشاها ولا وراه زنود تبري الكبت داخ..
يا كُثر ما خيبت ظن اللبيب..
يا كُثر ما غيبت وجه قريب..
يا كثر ما شاف منها أبيض النية وشاخ..
ارتكيت وظلي ما يموت..
واثرني كومت طعوم من غلاة أصحابها..
ما قدرت أقول آخ..
لي مبادئ وصاحبي لو جار من هالجور عادي..
وصاحبي لو هو قتل ذكراي عادي..
صاحبي لو هو بخل برضاعي عادي..
صاحبي لو هو خذل رجواي عادي..
صاحبي يبقى العزيز الناصع اللي له ودادي..
ودام أنا ستره وثوبه صاحبي..
ما قول عنه أبداً بتوبه..
يا هلا به وبعيوبه وبذنوبه يا هلا..
إن وصلني يا هلا..
إن قطعني يا هلا..
صاحبي ولاّ فلا..
والغلا نعمة كريم..
وساقه كل الملا..
ويا الفرج..
حاول تحب..
دام لأهل الأرض رب ولو تشوف أصحاب واجد حول قلبي..
لا تعاند السواعد من سراب..
الحصايد من يباب..
الشعر كذاب..
خلف التل شوارب خاذلينك..
ولا تخاف من الحرج..
لو قيل وينك كلهم مثلي تراهم بالنهاية طالبينك يا الفرج..
ويوم ضاقت قلت وينك يا الفرج؟..
قال جيت وشفت حولك ألف صاحب وخفت أسبب لك حرج.
.
.
صالح الشادي