[حسين الراوي]

للطفولة اقتران موصول بمراحل حياتنا الأخرى ، وللطفولة عالم شفاف فيه مشاعرنا أرق وأنبل .
كانت أيام جميلة تلك اللي مضت ، ولو أنها كانت أيام قاسية أحياناً ، لكنها تبقى الأصدق والأجمل .
لست بشاعر ، لكن أحيان أرتكب الشِعر بغفلة وأنا أعتذر منه ومنكم .

أنا اللي على بابك يمر ويجي ويروح
أنا اللي ضرب صحبة مع أطفال جيرانك

وأنا اللي يحول كل جد ويصير مزوح
إلى من صدف بالدرب واحد من اخوانك

وأنا اللي ليا من شفت شباكك المفتوح
وقفت أحرس الشارع بعيني على شانك

وأنا اللي تحمل ألف مرة : " عمى يالوح "
على كثر ما صرت أتصادم بجدرانك

أخاف العجوز اللي غضبها سعير يفوح
واحاذر تنادي أمك ، وأنا حول بيبانك

والى شفت زول شويّبٍ من بعيد يلوح
طلع للصلاة بمسجدٍ قرب عنوانك

تنحنحت عن يمناه : " بالخير أبو ملوح"
ومديت رجلي : " العفو يارب .. غفرانك " !

وإذا مر باص المدرسة ، رد فيني الروح
أبي بس نظرة عابرة ، قمة إحسانك

أحضْنْ الوسادة في ظلام الليالي بوح
وأناجي خيالك عشق ما مر وجدانك

مليت الدفاتر حبر شوق وغلا مسفوح
على كل صفحة اسمك ورسمك وعنوانك

تبي تدري شاللي هد في هالكيان صروح ؟
مسا ليلةٍ ، شفتك تخطّى بفستانك !

عليك البياض اللي ترك في حشاي جروح
كأنك تبي موتي وقدمت لي أكفانك !