[ريم علي]

روعتني فيـك دورات الليالـي
والليالي حالهـن حـالِ عجيـب
كنت اعدك من وفيين الرجالـي
لا تبوق ولا تخـون ولا تخيـب
لين طاح الستر من دون الخمالي
وانكشف فيك الخنا قبل المشيـب
آآآه ليت العمر من رجواك خالي
ليت رجلي ما مشت ذاك الشعيب
آآآه ياحرٍ على روس الطوالـي
كيف عقب النايفه طحـت بْقليـب
انحدرت بعين من سمّاك غالـي
لين ما تسـوى مناداتـك حبيـب
كم نشدني عنك من يخفاه حالي
قلت طيب وزايدٍ بالوقـت طيـب
وانت مثل الحنظله تشرب زلالي
والثمرمرٍ مع الغصـن الرطيـب
كم سقيتك من هواي ومن دلالي
كم عطيتك واثر ما شـيٍ يثيـب
الليالـي حسبـي الله ياااااليالـي
روعتني فيـك يالقـرم النجيـب
مادرت قلبٍ صلاه الله بْصالـي
متعبٍ من عاثر الدرب الصعيـب
يوم شافك بالظما حس الظلالـي
واثر له بحماك سجنٍ من لهيـب
حالته تشدى خلوجٍ فـي عْقالـي
يوم حايرها غدى دمـه صبيـب
يوم لجّت وانثنت بين الحبالـي
نوّخوها بيـن حنّـات ونحيـب
كان لي حبٍ جلا والهـم جالـي
والبواقي بعض ذكرى ما تغيـب


وحيدة السعودية